មេធាវីមួយរូបបានដាក់ពាក្យបណ្តឹងចោទប្រកាន់ទម្លាក់តំណែងប្រឆាំងនឹងលោកប្រធានាធិបតីហ្វីលីពីន Ferdinand Marcos Jr នៅថ្ងៃចន្ទ (១៩ មករា) នេះ ដោយចោទប្រកាន់លោកពីបទក្បត់ទំនុកចិត្តពីសាធារណជន ចំពោះការដែលលោក Marcos បណ្ដោយឱ្យអតីតមេដឹកនាំ គឺលោក Rodrigo Duterte ត្រូវបានចាប់ខ្លួន និងនាំខ្លួនទៅកាន់ទីក្រុងឡាអេ ដើម្បីប្រឈមមុខនឹងការកាត់ក្តី។

ពាក្យបណ្តឹង ដែលដាក់ដោយមេធាវីឈ្មោះលោក Andre De Jesus បានពិពណ៌នាសកម្មភាពប្រឆាំងនឹងលោក Duterte ថាជាទង្វើ «ចាប់ជំរិត»។ ការិយាល័យរបស់លោក Marcos បាននិយាយថា ខ្លួនគោរពដំណើរការប្រជាធិបតេយ្យនេះ ហើយជឿជាក់ថា សភា នឹងបំពេញកាតព្វកិច្ចដោយស្មោះត្រង់ និងសុចរិតចំពោះនីតិរដ្ឋ ដោយបន្ថែមថា ក្នុងពេលដែលដំណើរការទាំងនេះបន្តទៅមុខ លោកប្រធានាធិបតី Marcos នឹងនៅតែបន្តគ្រប់គ្រងប្រទេស។

គួរឱ្យដឹងថា លោក Duterte ដែលជាប្រធានាធិបតីពីឆ្នាំ២០១៦ ដល់ឆ្នាំ២០២២ ត្រូវបានចាប់ខ្លួន និងនាំទៅកាន់តុលាការព្រហ្មទណ្ឌអន្តរជាតិ (ICC) នៅទីក្រុងឡាអេ កាលពីខែមីនា ឆ្នាំ២០២៥ ពីបទចោទប្រកាន់សម្លាប់មនុស្សរាប់ពាន់នាក់ ដែលកើតឡើងក្នុងអំឡុងពេលសង្គ្រាមប្រឆាំងគ្រឿងញៀនដ៏ចម្រូងចម្រាសរបស់លោក។

លោក Marcos ដែលជាប់ឆ្នោតនៅឆ្នាំ២០២២ កំពុងបម្រើការជាប្រធានាធិបតីតែមួយអាណត្តិរយៈពេល ៦ឆ្នាំ ហើយរដ្ឋធម្មនុញ្ញ ហាមឃាត់លោកមិនឱ្យឈរឈ្មោះបោះឆ្នោតឡើងវិញនៅឆ្នាំ២០២៨នោះទេ ដែលធ្វើឱ្យលោកសល់ប្រហែលជា ២ឆ្នាំទៀតប៉ុណ្ណោះក្នុងតំណែងមេដឹកនាំហ្វីលីពីន៕