ប្រធានសិទ្ធិមនុស្សអង្គការសហប្រជាជាតិ បាននិយាយកាលពីថ្ងៃអាទិត្យថា សង្គ្រាមជិតបីឆ្នាំ បានធ្វើឲ្យប្រជាជនស៊ូដង់ឆ្លងកាត់ «ស្ថានភាពលំបាកយ៉ាងខ្លាំង» ដោយបានរិះគន់ថា ចំនួនទឹកប្រាក់ដ៏ច្រើនសន្ធឹកសន្ធាប់ ត្រូវបានចំណាយទៅលើអាវុធទំនើបៗ ដែលធ្វើឲ្យបាត់បង់ជំនួយមនុស្សធម៌ និងការជ្រើសរើសទាហានកុមារ។

ចាប់តាំងពីខែមេសា ឆ្នាំ ២០២៣ ប្រទេសស៊ូដង់ត្រូវបានវាយប្រហារដោយជម្លោះរវាងកងទ័ព និងកងកម្លាំងគាំទ្ររហ័ស (RSF) ដែលបានបណ្តាលឲ្យមនុស្សរាប់ម៉ឺននាក់ស្លាប់ និងប្រហែល ១១លាននាក់ ត្រូវបានផ្លាស់ទីលំនៅ។

ថ្លែងនៅទីក្រុងផែស៊ូដង់ ក្នុងអំឡុងពេលទស្សនកិច្ចលើកដំបូងរបស់ខ្លួនក្នុងសម័យសង្គ្រាម លោក Volker Turk ស្នងការសិទ្ធិមនុស្ស UN បាននិយាយថា ប្រជាជនបានស៊ូទ្រាំនឹង «ភាពភ័យរន្ធត់ និងស្ថានភាពដ៏លំបាក» ដោយហៅវាថា «គួរឲ្យស្អប់ខ្ពើម» ដោយមូលនិធិដែល «គួរតែត្រូវបានប្រើប្រាស់ ដើម្បីកាត់បន្ថយទុក្ខវេទនារបស់ប្រជាជន» ត្រូវបានចំណាយទៅលើអាវុធទំនើបៗ ជាពិសេសយានដ្រូន។

មនុស្សជាង ២១លាននាក់ កំពុងជួបប្រទះនឹងអសន្តិសុខស្បៀងដ៏ធ្ងន់ធ្ងរ ហើយពីរភាគបីនៃប្រជាជន ស៊ូដង់កំពុងត្រូវការជំនួយមនុស្សធម៌ជាបន្ទាន់។ នេះបើយោងតាមអង្គការសហប្រជាជាតិ។

លោក Turk បានបន្ថែមថា បន្ថែមពីលើវិបត្តិអត់ឃ្លាន និងការផ្លាស់ទីលំនៅដ៏ធំបំផុតរបស់ពិភពលោក ប្រទេសស៊ូដង់ ក៏កំពុងប្រឈមនឹង«ការកើនឡើងនូវយោធាភាវូបនីយកម្មនៅក្នុងសង្គម ដោយគ្រប់ភាគីទាំងអស់នៃជម្លោះ រួមទាំងតាមរយៈការបំពាក់អាវុធដល់ជនស៊ីវិល និងការជ្រើសរើស និងការប្រើប្រាស់កុមារ»៕