ប្រធានាធិបតីអ៊ីរ៉ង់ លោក Masoud Pezeshkian បានព្រមានកាលពីថ្ងៃអាទិត្យថា ការវាយប្រហារណាមួយលើមេដឹកនាំកំពូល លោក Ali Khamenei នឹងត្រូវបានចាត់ទុកថា ជាការប្រកាស «សង្គ្រាមទ្រង់ទ្រាយធំប្រឆាំងនឹងប្រជាជាតិអ៊ីរ៉ង់ បន្ទាប់ពីការផ្លាស់ប្តូរវោហាសាស្ត្រយ៉ាងធ្ងន់ៗជាមួយប្រធានាធិបតីអាមេរិក លោក ដូណាល់ ត្រាំ។

ការអត្ថាធិប្បាយរបស់លោក Pezeshkian ដែលបានបង្ហោះនៅលើវេទិកាប្រព័ន្ធផ្សព្វផ្សាយសង្គម X បានកើតឡើង ចំពេលមានភាពតានតឹងកាន់តែខ្លាំងឡើង បន្ទាប់ពីលោក ត្រាំ បានប្រាប់សារព័ត៌មាន Politico កាលពីថ្ងៃសៅរ៍ថា «គឺដល់ពេលដែលត្រូវស្វែងរកមេដឹកនាំថ្មីនៅក្នុងប្រទេសអ៊ីរ៉ង់ហើយ»។

លោក Pezeshkian បានសរសេរថា៖«ការវាយប្រហារណាមួយលើមេដឹកនាំដ៏អស្ចារ្យរបស់យើង នឹងស្មើនឹងសង្គ្រាមពេញបន្ទុកប្រឆាំងនឹងប្រជាជាតិអ៊ីរ៉ង់»។

ប្រធានាធិបតីអ៊ីរ៉ង់រូបនេះ ក៏បានស្តីបន្ទោសទីក្រុងវ៉ាស៊ីនតោនចំពោះវិបត្តិសេដ្ឋកិច្ចរបស់ប្រទេសនេះ ដោយលើកឡើងពី «អរិភាពយូរអង្វែង» និង «ទណ្ឌកម្មអមនុស្សធម៌» ដែលដាក់ដោយសហរដ្ឋអាមេរិក និង      សម្ព័ន្ធមិត្តរបស់ខ្លួនថា ជាកត្តាជំរុញចម្បងនៃការលំបាកសម្រាប់ប្រជាជនអ៊ីរ៉ង់។

ជម្លោះការទូតកាន់តែធ្ងន់ធ្ងរឡើងកាលពីព្រឹកថ្ងៃសៅរ៍ នៅពេលដែលលោក Khamenei បានហៅលោក ត្រាំថា ជា«ឧក្រិដ្ឋជន» ដោយចាត់ទុកលោកថា ជាអ្នកទទួលខុសត្រូវចំពោះអ្នកស្លាប់ និងរបួស និងការខូចខាតដែលបានកើតឡើងក្នុងអំឡុងពេលថ្មីៗនេះនៃភាពចលាចលក្នុងស្រុក នៅក្នុងប្រទេសអ៊ីរ៉ង់។

ទំនាក់ទំនងរវាងទីក្រុងតេអេរ៉ង់ និងទីក្រុងវ៉ាស៊ីនតោន នៅតែមានភាពច្របូកច្របល់ ចាប់តាំងពីការវិល ត្រឡប់របស់លោក ត្រាំ មកកាន់តំណែងសេតវិមានវិញ ដែលត្រូវបានកំណត់លក្ខណៈដោយការបន្តគោលនយោបាយ«សម្ពាធអតិបរមា»និងការប្រឈមមុខដាក់គ្នាជាញឹកញាប់រវាងថ្នាក់ដឹកនាំនៃប្រទេសទាំងពីរ៕