ប្រទេសអ៊ីរ៉ាក់កាលពីថ្ងៃអាទិត្យ បានប្រកាសអំពីការដកចេញទាំងអស់នូវទីប្រឹក្សានៃកងកម្លាំងចម្រុះអន្តរជាតិចេញពីមូលដ្ឋានយោធា និងមជ្ឈមណ្ឌលបញ្ជាការទាំងអស់ នៅក្នុងតំបន់ដែលគ្រប់គ្រងដោយរដ្ឋាភិបាលសហព័ន្ធអ៊ីរ៉ាក់។

គណៈកម្មការយោធាជាន់ខ្ពស់ ដែលមានភារកិច្ចបញ្ចប់បេសកកម្មចម្រុះអន្តរជាតិ បាននិយាយនៅក្នុងសេចក្តីថ្លែងការណ៍មួយថា ទីប្រឹក្សាដែលនៅសេសសល់មួយចំនួនតូច បានចាកចេញពីមូលដ្ឋានទ័ពអាកាស Ayn al-Asad នៅអ៊ីរ៉ាក់ និងទីបញ្ជាការប្រតិបត្តិការរួម ដោយដាក់ទីតាំងយុទ្ធសាស្ត្រទាំងនេះឲ្យស្ថិតនៅក្រោមការគ្រប់គ្រងពេញលេញរបស់កងកម្លាំងសន្តិសុខអ៊ីរ៉ាក់។

ដំណាក់កាលដំបូងនៃបេសកកម្មយោធារបស់កងកម្លាំងចម្រុះអន្តរជាតិ ដើម្បីប្រយុទ្ធប្រឆាំងនឹងរដ្ឋអ៊ីស្លាម (IS) នៅក្នុងទឹកដីសហព័ន្ធអ៊ីរ៉ាក់បានបញ្ចប់ហើយ ហើយប្រទេសនេះនាពេលបច្ចុប្បន្ន បានផ្លាស់ប្តូរទៅជាទំនាក់ទំនងសន្តិសុខទ្វេភាគីជាមួយសហរដ្ឋអាមេរិក។ នេះបើយោងតាមសេចក្តីថ្លែងការណ៍។

ទំនាក់ទំនងនេះ នឹងផ្តោតលើការធ្វើឲ្យដំណើរការនូវអនុស្សរណៈនៃការយោគយល់គ្នាសម្រាប់កិច្ចសហប្រតិបត្តិការយោធា និងការអភិវឌ្ឍសមត្ថភាពរបស់កងកម្លាំងប្រដាប់អាវុធអ៊ីរ៉ាក់ ក្នុងវិស័យឧបករណ៍ អាវុធ ការបណ្តុះបណ្តាល ហ្វឹកហ្វឺន សមយុទ្ធ និងប្រតិបត្តិការរួមគ្នា ដើម្បីធានាបាននូវការត្រៀមខ្លួនជាបន្ត ដើម្បីប្រយុទ្ធប្រឆាំងនឹង IS។

ក្រសួងបានកត់សម្គាល់ថា ដំណាក់កាលទី២ នៃបេសកកម្មរបស់ក្រុមចម្រុះអន្តរជាតិ ក្នុងការប្រយុទ្ធប្រឆាំងនឹងក្រុម IS នៅក្នុងប្រទេសស៊ីរី បានចាប់ផ្តើម និងការសម្របសម្រួលជាមួយក្រុមចម្រុះនេះ នឹងបន្តទាក់ទងនឹងការកម្ចាត់ក្រុម IS ឲ្យអស់ទាំងស្រុង នៅក្នុងប្រទេសស៊ីរី។

កាលពីថ្ងៃសៅរ៍ ក្រសួងការពារជាតិអ៊ីរ៉ាក់បាននិយាយថា កងទ័ពរបស់ប្រទេសនេះ បានគ្រប់គ្រងពេញលេញលើមូលដ្ឋានទ័ពអាកាស Ayn al-Asad ដែលជាមូលដ្ឋានទ័ពធំទី២របស់ខ្លួន នៅក្នុងខេត្ត Anbar ភាគខាងលិច បន្ទាប់ពីទ័ពអាមេរិកបានដកចេញ៕