ឯកអគ្គរដ្ឋទូតអ៊ីរ៉ង់ប្រចាំប្រទេសរុស្ស៊ី លោក Kazem Jalali បាននិយាយនៅក្នុងអត្ថបទមួយដែលរៀបចំសម្រាប់សារព័ត៌មានថា TASSថា ភាពចលាចលនៅទីក្រុងតេអេរ៉ង់ ត្រូវបានបង្កឡើងដោយភ្នាក់ងារអ៊ីស្រាអែល។  

ឯកអគ្គរដ្ឋទូតរូបនេះ បានកត់សម្គាល់ថា ចេញពីទស្សនៈនៃការវិវត្តក្នុងតំបន់ ព្រឹត្តិការណ៍នៃថ្ងៃទី ០៨ ខែមករា គួរតែត្រូវបានចាត់ទុកថា ជា «ការបន្តនូវព្រឹត្តិការណ៍ជាបន្តបន្ទាប់ ដែលបានចាប់ផ្តើមនៅក្នុងខែ   មិថុនា ឆ្នាំ ២០២៥ និងសង្គ្រាមរយៈពេល ១២ថ្ងៃ ដែលធ្វើឡើងដោយរបបអ៊ីស្រាអែល និងសហរដ្ឋអាមេ  រិកប្រឆាំងនឹងអ៊ីរ៉ង់»។  

អ្នកការទូតអ៊ីរ៉ង់ បាននិយាយថា៖«លើកនេះ រដ្ឋាភិបាលអ៊ីរ៉ង់បានចូលរួមក្នុងកិច្ចចរចា កិច្ចខិតខំប្រឹងប្រែងផ្សះផ្សា និងការស្វែងរកមធ្យោបាយ ដើម្បីដោះស្រាយបញ្ហា នៅពេលដែលអង្គភាពភេរវកម្មអ៊ីស្រាអែល   បានចាប់ផ្តើមប្រតិបត្តិការនៅក្នុងទីក្រុងផ្សេងៗភ្លាមៗ ដោយប្រើប្រាស់បាតុកម្មរបស់កម្មករដោយសន្តិវិធីជាឧបករណ៍នៃសង្គ្រាមតំណាងក្រោមរូបភាពនៃភាពវឹកវរ និងកុបកម្ម»។

លោកឯកអគ្គរដ្ឋទូតក៏បានកត់សម្គាល់ផងដែរថា ការវិភាគអំពីសកម្មភាពរបស់អ្នកដើរតួសំខាន់ៗ អំឡុងពេលដែលមានបញ្ហានេះ បង្ហាញពី«ការផ្លាស់ប្តូរយុទ្ធសាស្ត្រ និងការងាកទៅរកអំពើហិង្សា បន្ទាប់ពីការបរាជ័យក្នុងការសម្រេចបាននូវគោលបំណងដែលបានបញ្ជាក់»។

ភាពចលាចលនៅក្នុងប្រទេសអ៊ីរ៉ង់ បានចាប់ផ្តើមនៅថ្ងៃទី ២៩ ខែធ្នូ ឆ្នាំ ២០២៥ នៅពេលដែលការតវ៉ាតាមដងផ្លូវដែលបង្កឡើងដោយការធ្លាក់ចុះយ៉ាងខ្លាំងនៃអត្រាប្តូរប្រាក់រីអាល់អ៊ីរ៉ង់ បានរីករាលដាលពាសពេញទីក្រុងធំៗភាគច្រើន។ អាជ្ញាធរបានរាយការណ៍ពីការស្លាប់របស់មន្ត្រីអនុវត្តច្បាប់ចំនួន ៤០នាក់។ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានអះអាងថា ភេរវករប្រដាប់អាវុធបានបង្ហាញខ្លួនក្នុងចំណោមក្រុមបាតុករ នៅថ្ងៃទី ០៨ ខែមករា៕