ប្រទេសអឺរ៉ុបទាំង៨ ដែលត្រូវបានកំណត់គោលដៅដោយប្រធានាធិបតីអាមេរិក លោក Donald Trump សម្រាប់ការដំឡើងពន្ធ ១០ភាគរយ ដោយសារការប្រឆាំងនឹងការគ្រប់គ្រងរបស់សហរដ្ឋអាមេរិក លើកោះ Greenland បានរិះគន់ចំណាត់ការនេះ កាលពីថ្ងៃអាទិត្យ (ទី១៨ ខែមករា ឆ្នាំ២០២៦) ដោយព្រមានថា ការគំរាមកំហែងរបស់លោក «ធ្វើឲ្យខូចដល់ទំនាក់ទំនងឆ្លងមហាសមុទ្រអាត្លង់ទិក និងបង្កជាហានិភ័យឲ្យមានផលវិបាកដ៏គ្រោះថ្នាក់ខ្លាំងឡើងៗ»។

សេចក្តីថ្លែងការណ៍រួមដោយសម្ព័ន្ធមិត្តជិតស្និទ្ធបំផុតមួយចំនួនរបស់អាមេរិក បានបង្ហាញពីលទ្ធភាពនៃការមានចំណុចរបត់នៅក្នុងភាពតានតឹងថ្មី ពាក់ព័ន្ធនឹងអធិបតេយ្យភាព និងសន្តិសុខ ក្នុងរយៈពេលជិត ២៤ម៉ោងនេះ បន្ទាប់ពីលោក Trump ព្រលយនូវការគំរាមកំហែង។ ហើយនេះក៏ជាការស្តីបន្ទោសយ៉ាងខ្លាំងបំផុតលើលោក Trump ពីសម្ព័ន្ធមិត្តអឺរ៉ុប ចាប់តាំងពីលោកបានវិលត្រឡប់ទៅអង្គុយកៅអីសេតវិមានវិញ កាលពីជិត ១ឆ្នាំកន្លងទៅ។ ក្នុងរយៈពេលប៉ុន្មានខែថ្មីៗនេះ បណ្ដាប្រទេសអឺរ៉ុបភាគច្រើន បានសម្រេចជ្រើសរើសការទូតស្របតាមរូបលោក សូម្បីតែនៅពេលស្វែងរកការបញ្ចប់សង្គ្រាម នៅអ៊ុយក្រែន។ តែសេចក្តីថ្លែងការណ៍កាលពីថ្ងៃអាទិត្យ ក៏ដូចជាប្រទេសអឺរ៉ុបមួយចំនួនបញ្ជូនកងទ័ពទៅកាន់កោះ Greenland ដើម្បីចូលរួមសមយុទ្ធហ្វឹកហ្វឺនយោធារបស់ប្រទេសដាណឺម៉ាក ហាក់ដូចជាងាកចេញពីយុទ្ធសាស្ត្រនោះ។

តែយ៉ាងណាក្ដី សេចក្តីថ្លែងការណ៍រួមខ្លាំងៗមិនធម្មតាពីដាណឺម៉ាក ន័រវ៉ែស ស៊ុយអែត បារាំង អាល្លឺម៉ង់ ចក្រភពអង់គ្លេស ហូឡង់ និងហ្វាំងឡង់ បានបញ្ជាក់ថា កងទ័ពដែលត្រូវបានបញ្ជូនទៅដែនដី Greenland សម្រាប់ប្រតិបត្តិការ «Arctic Endurance» មិនមែនជាការគំរាមកំហែងដល់នរណាម្នាក់ឡើយ»។ ប្រទេសចំនួន ៦ ដែលត្រូវបានកំណត់គោលដៅនេះ គឺជាផ្នែកមួយនៃសហភាពអឺរ៉ុប (EU) ដែលមានសមាជិក ២៧ប្រទេស ដែលដំណើរការជាតំបន់សេដ្ឋកិច្ចតែមួយទាក់ទងនឹងពាណិជ្ជកម្ម។

បន្ទាប់ពីមានការពិភាក្សាបន្ទាន់មួយ ក្នុងចំណោមអ្នកតំណាងជាតិរបស់ EU កាលពីថ្ងៃអាទិត្យ ប្រធានក្រុមប្រឹក្សា EU លោក Antonio Costa បាននិយាយថា មេដឹកនាំនៃប្លុកនេះ យល់ឃើញដូចគ្នាថា «ពន្ធគយនឹងធ្វើឲ្យខូចទំនាក់ទំនងអន្តរអាត្លង់ទិក និងផ្ទុយពីកិច្ចព្រមព្រៀងពាណិជ្ជកម្ម EU-US (សហភាពអឺរ៉ុប-សហរដ្ឋអាមេរិក)៕