ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ (ទី១៨ ខែមករា ឆ្នាំ២០២៦) ថា ប្រទេសដាណឺម៉ាកមិនអាចធ្វើអ្វីបានឡើយ ក្នុងការដក «ការគំរាមកំហែងរបស់រុស្ស៊ី» ចេញពីដែនដី Greenland ទេ ហើយបានបញ្ជាក់ថា «ឥឡូវនេះដល់ពេលហើយ ហើយវានឹងត្រូវសម្រេចឲ្យបាន!!!»។

នៅក្នុងសារមួយលើគេហទំព័របណ្ដាញសង្គមដែលលោកជាម្ចាស់ឈ្មោះ Truth Social លោក Trump បានសរសេរថា៖ «អង្គការណាតូ (NATO) បានប្រាប់ប្រទេសដាណឺម៉ាកអស់រយៈពេល ២០ឆ្នាំមកហើយថា ត្រូវតែធ្វើឲ្យការគំរាមកំហែងរបស់រុស្ស៊ីបាត់ពីកោះ Greenland។ តែគួរឲ្យសោកស្ដាយ ប្រទេសដាណឺម៉ាកមិនអាចធ្វើអ្វីបានឡើយ ពាក់ព័ន្ធនឹងបញ្ហានេះ»។

ពាក់ព័ន្ធនឹងការលើកឡើងរបស់លោក Trump នេះ សេតវិមាន ការិយាល័យប្រធានាធិបតីដាណឺម៉ាក នៅសហភាពអឺរ៉ុប និងក្រសួងការបរទេសរបស់ប្រទេសដាណឺម៉ាក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់សារព័ត៌មាន Reuters។

លោក Trump បានទទូចម្តងហើយម្តងទៀតថា លោកនឹងដោះស្រាយ ចំពោះអ្វីដែលគ្មានអ្វីក្រៅពីការក្លាយជាម្ចាស់លើកោះ Greenland ដែលជាទឹកដីស្វយ័តរបស់ដាណឺម៉ាក។ មេដឹកនាំដាណឺម៉ាក និងកោះ Greenland បានទទូចថា កោះនេះមិនមែនសម្រាប់លក់ទេ ហើយមិនចង់ក្លាយជាផ្នែកមួយរបស់សហរដ្ឋអាមេរិកនោះឡើយ។

កាលពីថ្ងៃសៅរ៍ចុងសប្ដាហ៍កន្លងទៅ លោក Trump បានសន្យាថា នឹងអនុវត្តគោលការដំឡើងពន្ធជាបន្ទាប់ លើសម្ព័ន្ធមិត្តអឺរ៉ុប រហូតទាល់តែសហរដ្ឋអាមេរិកត្រូវបានអនុញ្ញាតឲ្យទិញកោះ Greenland។ លោក Trump បានផ្ដល់ហេតុផលថា វត្តមានរបស់ចិន និងរុស្ស៊ី ធ្វើឲ្យកោះ Greenland មានសារៈសំខាន់ ចំពោះផលប្រយោជន៍សន្តិសុខរបស់សហរដ្ឋអាមេរិក៕