អាជ្ញាធរអាកាសចរណ៍ឥណ្ឌា កាលពីថ្ងៃសៅរ៍ (ទី១៧ ខែមករា ឆ្នាំ២០២៦) ចុងសប្ដាហ៍កន្លងមក បានពិន័យក្រុមហ៊ុនអាកាសចរណ៍ IndiGo ចំនួន ២,៤៥លានដុល្លារអាមេរិក ដោយបានចេញការព្រមានដល់នាយកប្រតិបត្តិជាន់ខ្ពស់ និងបានបង្គាប់បញ្ជាឲ្យក្រុមហ៊ុននេះដកប្រធានផ្នែកគ្រប់គ្រងប្រតិបត្តិការរបស់ខ្លួន ចេញពីតួនាទី បន្ទាប់ពីមានការលុបចោលជើងហោះហើរទ្រង់ទ្រាយធំកាលពីខែមុន។

គួរបញ្ជាក់ថា ក្រុមហ៊ុនអាកាសចរណ៍ធំជាងគេរបស់ប្រទេសឥណ្ឌាមួយនេះ បានលុបចោលជើងហោះហើរប្រហែល ៤.៥០០ជើង ក្នុងរយៈពេលប៉ុន្មានសប្តាហ៍ដំបូងនៃខែធ្នូឆ្នាំមុន ដែលធ្វើឲ្យអ្នកដំណើររាប់ម៉ឺននាក់ទូទាំងប្រទេសជាប់នៅក្នុងអាកាសយានដ្ឋាន និងបានបង្ហាញឲ្យឃើញពីក្ដីបារម្ភ អំពីការប្រកួតប្រជែងមានកម្រិត នៅក្នុងទីផ្សារអាកាសចរណ៍ដែលមានភាពរីកចម្រើនលឿនបំផុតរបស់ពិភពលោក។

ក្រុមហ៊ុនអាកាសចរណ៍នេះបានទទួលស្គាល់ថា ការរៀបចំបញ្ជីឈ្មោះអ្នកបើកយន្តហោះមិនល្អ គឺជាមូលហេតុចម្បងនាំឲ្យមានការរំខាន។ យោងតាមសេចក្តីថ្លែងការណ៍របស់អាជ្ញាធរ បានឲ្យដឹងថា ការស៊ើបអង្កេតដោយអគ្គនាយកដ្ឋានអាកាសចរណ៍ស៊ីវិល (DGCA) បានរកឃើញចំណុចខ្វះខាតជាច្រើន នៅក្នុងក្រុមហ៊ុនអាកាសចរណ៍នេះ បន្ទាប់ពីច្បាប់សម្រាក និងកាតព្វកិច្ចរបស់អ្នកបើកយន្តហោះកាន់តែតឹងរ៉ឹង បានចូលជាធរមានកាលពីឆ្នាំមុន។

ប្រភពពីរដ្ឋាភិបាល បានឲ្យដឹងថា ការពិន័យនេះ គឺជាចំនួនច្រើនបំផុតដែលអាជ្ញាធរបានដាក់ រហូតមកដល់ពេលនេះ ទោះបីជាវាមានត្រឹមតែ ០,៣១ភាគរយនៃប្រាក់ចំណេញប្រចាំឆ្នាំរបស់ក្រុមហ៊ុនអាកាសចរណ៍ IndiGo សម្រាប់ឆ្នាំសារពើពន្ធ ២០២៤-២០២៥ ក៏ដោយ។

ក្រុមហ៊ុនអាកាសចរណ៍ IndiGo បានលើកឡើងនៅក្នុងសេចក្តីថ្លែងការណ៍មួយថា ក្រុមប្រឹក្សាភិបាល «យល់ដឹងយ៉ាងពេញលេញនូវបទបញ្ជារនេះ ហើយនឹងចាត់វិធានការដ៏សមស្របប្រកបដោយការគិតគូរ និងទាន់ពេលវេលា»៕