មនុស្សរាប់ពាន់នាក់ នៅសហរដ្ឋអាមេរិក បានធ្វើបាតុកម្មទ្រង់ទ្រាយធំ កាលពីថ្ងៃអាទិត្យ (ទី១៨ ខែមករា ឆ្នាំ២០២៦) ដោយថ្កោលទោសការបង្ក្រាបដ៏សាហាវរបស់រដ្ឋាភិបាលអ៊ីរ៉ង់ លើក្រុមបាតុករប្រឆាំងរដ្ឋាភិបាល នៅក្នុងសាធារណរដ្ឋឥស្លាម។

មនុស្សរាប់ពាន់នាក់បានដង្ហែក្បួននៅទីក្រុង Los Angeles ជាទីកន្លែងដែលជនជាតិអ៊ីរ៉ង់រស់នៅក្រៅប្រទេសច្រើនជាងគេបំផុតរបស់ពិភពលោក ខណៈពេលដែលមនុស្សរាប់រយនាក់ផ្សេងទៀត បានប្រមូលផ្តុំគ្នានៅទីក្រុង New York។ នេះបើយោងតាមការរាយការណ៍របស់អ្នកសារព័ត៌មានសរបស់ទីភ្នាក់ងារសារព័ត៌មាន AFP នៅក្នុងទីក្រុងទាំង២។

អំឡុងការតវ៉ានោះ គេឃើញក្រុមបាតុករអាមេរិកកាន់បដាថ្កោលទោស «ការប្រព្រឹត្តិវិនាសកម្មលើមនុស្សជាតិថ្មី» ជាអំពើប្រល័យពូជសាសន៍ដែលកំពុងកើតឡើង» និងជាប្រភពនៃ «ភេរវកម្ម» របស់រដ្ឋាភិបាលអ៊ីរ៉ង់។

គួរបញ្ជាក់ថា បាតុកម្មដែលបង្កឡើងដោយកំហឹង ដោយសារបញ្ហាលំបាកផ្នែកសេដ្ឋកិច្ច បានផ្ទុះឡើងទៅជាការតវ៉ា កាលពីចុងខែធ្នូ ឆ្នាំ២០២៥ ជាអ្វីដែលត្រូវបានគេមើលឃើញយ៉ាងទូលំទូលាយថា ជាបញ្ហាប្រឈមដ៏ធំបំផុត ចំពោះថ្នាក់ដឹកនាំអ៊ីរ៉ង់ ក្នុងរយៈពេលប៉ុន្មានឆ្នាំថ្មីៗនេះ។

ការជួបជុំនោះបានថយចុះបន្ទាប់ពីមានការបង្ក្រាបរបស់រដ្ឋាភិបាលនៅអ៊ីរ៉ង់ ដែលក្រុមសិទ្ធិមនុស្ស បានហៅថា ជា «ការសម្លាប់រង្គាល» ដែលធ្វើឡើងដោយកងកម្លាំងសន្តិសុខ ក្រោមការបិទបាំងនៃការទំនាក់ទំនងដែលបានចាប់ផ្តើមនៅថ្ងៃទី៨ ខែមករា។

អង្គការសិទ្ធិមនុស្សអ៊ីរ៉ង់ដែលមានមូលដ្ឋាននៅប្រទេសន័រវ៉ែស ឲ្យដឹងថា ខ្លួនបានផ្ទៀងផ្ទាត់ការស្លាប់របស់អ្នកតវ៉ាចំនួន ៣.៤២៨នាក់ដែលត្រូវបានសម្លាប់ដោយកងកម្លាំងសន្តិសុខ ដោយបញ្ជាក់ពីករណីនេះ តាមរយៈប្រភពនៅក្នុងប្រព័ន្ធសុខាភិបាល និងវេជ្ជសាស្ត្ររបស់សាធារណរដ្ឋឥស្លាម សាក្សី និងប្រភពឯករាជ្យផ្សេងទៀត៕