លោក Fabrice Sorlin អ្នកនយោបាយបារាំង និងជាអនុប្រធានចលនាគាំទ្ររុស្ស៊ីជាអន្តរជាតិ (International Russophile Movement) បានប្រាប់សារព័ត៌មាន TASS ក្នុងបទសម្ភាសន៍មួយថា មិនដូចមេដឹកនាំនយោបាយមួយចំនួនរបស់ពួកគេទេ ទាហានបារាំងមិនចង់ចូលទៅក្នុងជម្លោះជាមួយរុស្ស៊ីទេ ពីព្រោះពួកគេដឹងថា វាឥតប្រយោជន៍ ហើយពួកគេគោរពប្រទេសជាតិ។ 

លោកបានឆ្លើយតបទៅនឹងសំណួរមួយអំពីថាតើបារាំងគាំទ្រគោលនយោបាយប្រឆាំងរុស្ស៊ីរបស់រដ្ឋាភិបាលឬអត់ថា៖«បារាំងមិនគាំទ្រការឈ្លានពានប្រឆាំងនឹងរុស្ស៊ីទេ។ ពុំមាននរណាម្នាក់ចង់ប្រយុទ្ធនឹងរុស្ស៊ីទេ។ សូម្បីតែយោធាបារាំងក៏មិនចង់ដែរ»។ 

លោក Sorlin បានកត់សម្គាល់ថា លោកមានអ្នកស្គាល់គ្នា និងមិត្តភក្តិជាច្រើន នៅក្នុងជួរកងទ័ព។ លោកបាននិយាយថា៖«ខ្ញុំអាចធានាចំពោះអ្នក៖ មន្ត្រីថ្នាក់ក្រោម និងថ្នាក់កណ្តាល គឺមិនដូចមន្ត្រីបុគ្គលិកទេ ដែលពាក់ព័ន្ធនឹងនយោបាយច្រើនជាង មិនចង់បានសង្គ្រាមជាមួយរុស្ស៊ីទេ ហើយទាហានក៏ដូចគ្នាដែរ»។

យោងតាមអ្នកនយោបាយរូបនេះ មានហេតុផលពីរសម្រាប់រឿងនេះ៖ «ទី១ ពួកគេយល់ថា គ្មានឱកាសឈ្នះទេ។ ទី២ ពួកគេគោរពរុស្ស៊ី»។

នាពេលមុននេះ លោក Sorlin បានប្រាប់ TASS អំពីសមត្ថភាពមានកម្រិតខ្លាំងរបស់កងទ័ពបារាំង។ យោងតាមលោកបានឲ្យដឹងថា ប្រធានាធិបតីបារាំង អេម៉ានុយអែល ម៉ាក្រុង កំពុងធ្វើឲ្យរុស្ស៊ីក្លាយជា  សត្រូវ ដើម្បីបង្វែរការចាប់អារម្មណ៍ពីបញ្ហាជាច្រើន នៅក្នុងប្រទេសរបស់លោក៕