អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃចន្ទ (ទី១៩ ខែមករា ឆ្នាំ២០២៦) នេះថា ប្រធានាធិបតីរុស្ស៊ី លោក Vladimir Putin ត្រូវបានអញ្ជើញឲ្យចូលរួមក្នុង «ក្រុមប្រឹក្សាសន្តិភាព» ជាស្ថាប័នអន្តរជាតិថ្មីមួយដែលមានគោលបំណងដោះស្រាយជម្លោះនានា ដោយចាប់ផ្តើមពីស្ថានភាព នៅតំបន់ហ្កាហ្សា។

អំឡុងពេលនិយាយនៅឯសន្និសីទសារព័ត៌មានមួយ ក្នុងទីក្រុងមូស្គូ លោក Peskov បានប្រាប់ថា រុស្ស៊ីកំពុងសិក្សាពីសំណើនេះ។ លោកបានបញ្ជាក់ថា៖ «មែនហើយ ពិតណាស់ តាមរយៈបណ្តាញការទូត លោកប្រធានាធិបតី Putin ក៏បានទទួលផងដែរនូវការអញ្ជើញឲ្យចូលរួមក្រុមប្រឹក្សាសន្តិភាពនេះ។ នៅពេលនេះ យើងកំពុងពិនិត្យមើលសេចក្ដីលម្អិតទាំងអស់នៃសំណើនេះ ដោយរួមទាំងក្ដីសង្ឃឹមមានទំនាក់ទំនងជាមួយភាគីអាមេរិក ដើម្បីបញ្ជាក់ឲ្យកាន់តែច្បាស់គ្រប់យ៉ាង»។

គួរបញ្ជាក់ថា សេតវិមានបានប្រកាសពីការបង្កើតក្រុមប្រឹក្សាសន្តិភាពក្នុងសេចក្តីថ្លែងការណ៍មួយ កាលពីថ្ងៃសុក្រចុងសប្ដាហ៍កន្លងមក ដោយពិពណ៌នាវាថា ជាកិច្ចប្រឹងប្រែង ដែលមានបំណង «ដើរតួនាទីយ៉ាងសំខាន់ ក្នុងការបំពេញ» ផែនការ ២០ចំណុច របស់លោកប្រធានាធិបតី Trump ដើម្បីបញ្ចប់ជាអចិន្ត្រៃយ៍នូវសង្គ្រាមរបស់អ៊ីស្រាអែល និងកសាងតំបន់នោះឡើងវិញ ក៏ដូចជា «ផ្តល់ការត្រួតពិនិត្យជាយុទ្ធសាស្ត្រ ការកៀរគរធនធានអន្តរជាតិ និងធានាការទទួលខុសត្រូវ ខណៈដែលតំបន់ហ្កាហ្សា កំពុងចេញពីជម្លោះ ឆ្ពោះទៅសន្តិភាព និងការអភិវឌ្ឍ»។

សហរដ្ឋអាមេរិកក៏បានបង្កើតផងដែរនូវគណៈកម្មាធិការជាតិ សម្រាប់រដ្ឋបាលហ្កាហ្សា (NCAG) ដើម្បីអនុវត្តដំណាក់កាលទី២ នៃផែនការគ្រប់ជ្រុងជ្រោយរបស់លោក Trump ដើម្បីបញ្ចប់ជម្លោះ នៅតំបន់ហ្កាហ្សា រួមជាមួយនឹងក្រុមប្រឹក្សាភិបាលប្រតិបត្តិស្ថាបនិក និងក្រុមប្រឹក្សាភិបាលប្រតិបត្តិហ្កាហ្សា ជាការគាំទ្រដល់ NCAG៕