អង្គការសហប្រជាជាតិ (UN) បានព្រមាននៅថ្ងៃចន្ទ (ទី១៩ ខែមករា ឆ្នាំ២០២៦) នេះថា ស្ថានភាពមនុស្សធម៌ នៅក្នុងប្រទេសយេម៉ែន កំពុងកាន់តែអាក្រក់ទៅៗ ហើយដំណើរការដ៏ល្អដែលសម្រេចបាន ក្នុងការដោះស្រាយបញ្ហាកង្វះអាហារូបត្ថម្ភ និងសុខភាព នឹងប្រែទៅជាបាត់បង់វិញ ដោយសារតែការកាត់បន្ថយមូលនិធិ។

លោក Julien Harneis អ្នកសម្របសម្រួលផ្នែកមនុស្សធម៌ និងជាតំណាងអង្គការសហប្រជាជាតិប្រចាំប្រទេសយេម៉ែន បានប្រាប់អ្នកសារព័ត៌មាននៅទីក្រុងហ្សឺណែវ ប្រទេសស្វីសថា៖ «បរិបទនេះគឺគួរឲ្យព្រួយបារម្ភខ្លាំងណាស់។ យើងរំពឹងថា អ្វីៗនឹងកាន់តែអាក្រក់ទៅៗ នៅឆ្នាំ២០២៦ នេះ»។

យោងតាម UN បានឲ្យដឹងថា មនុស្សប្រមាណជា ២១លាននាក់ នឹងត្រូវការជំនួយមនុស្សធម៌នៅឆ្នាំនេះ ដែលកើនឡើងពីចំនួន ១៩,៥លាននាក់ កាលពីឆ្នាំមុន។ ហើយលោក Harneis បានបញ្ជាក់ថា ស្ថានភាពនេះកាន់តែធ្ងន់ធ្ងរឡើងៗ ដោយសារការដួលរលំសេដ្ឋកិច្ច និងការរំខានដល់សេវាកម្មសំខាន់ៗ ក្នុងនោះរួមទាំងសុខភាព និងការអប់រំ ហើយនិងភាពមិនប្រាកដប្រជាផ្នែកនយោបាយ។

លោក Herneis បានបន្ថែមថា មូលនិធិដែលយេម៉ែនទទួលបានពីប្រទេសលោកខាងលិចតាមទម្លាប់ ឥឡូវនេះ កំពុងត្រូវបានកាត់បន្ថយ ដោយបានចង្អុលបង្ហាញពីក្តីសង្ឃឹមទទួលបានជំនួយបន្ថែមទៀតពីប្រទេសឈូងសមុទ្រ។

សហរដ្ឋអាមេរិកបានកាត់បន្ថយការចំណាយលើជំនួយរបស់ខ្លួន នៅឆ្នាំនេះ ហើយប្រទេសផ្តល់ជំនួយឈានមុខគេរបស់លោកខាងលិច ក៏បានកាត់បន្ថយការផ្ដល់មូលនិធិផងដែរ ខណៈដែលប្រទេសទាំងនោះបានងាកទៅបង្កើនការចំណាយលើផ្នែកការពារជាតិវិញ ដែលបង្កឲ្យមានវិបត្តិហិរញ្ញវត្ថុ សម្រាប់ UN។ យេម៉ែនគឺជាកន្លែងដ៏សំខាន់នៃប្រតិបត្តិការមនុស្សធម៌ដ៏ធំបំផុតមួយរបស់ពិភពលោក អំឡុងសង្គ្រាមស៊ីវិលមួយទសវត្សរ៍ ដែលបានរំខានដល់ការផ្គត់ផ្គង់ស្បៀងអាហារ៕