ព្យុះថ្មីត្រូវបានគេព្យាករថាវាយប្រហារតំបន់ហ្កាហ្សា នឹងបង្កទុក្ខទោសបន្ថែមទៀតដល់ជនប៉ាឡេស្ទីនរាប់ម៉ឹននាក់ ដែលកំពុងរស់នៅក្នុងសំពត់តង់បណ្តោះអាសន្ន ក្នុងជំរំជម្លៀសខ្លួនដែលមិនស័ក្តិសមទប់ទល់ជាមួយស្ថានភាពអាកាសធាតុរដូវរងាដ៏អាក្រក់នេះ ។

សង្រ្គាមប្រល័យពូជសាសន៍រយៈពេលជាង ២ឆ្នាំរបស់អ៊ីស្រាអែល បានបង្ខំឲ្យពលរដ្ឋស្ទើទាំងស្រុង ២លាននាក់ ក្នុងតំបន់ហ្កាហ្សា ចាកចេញពីលំនៅដ្ឋានរបស់ពួកគេ ដើម្បីមករស់នៅដូចសត្វធាតុ ក្នុងជម្រកបណ្តោះអាសន្ន ។

កាលពីសប្តាហ៍មុន ការិយាល័យសារព័ត៌មានរដ្ឋាភិបាលហ្កាហ្សា រាយការណ៍ថា សំពត់តង់ចំនួន ១២៧.០០០ ក្នុងចំណោមសំពត់តង់ចំនួន ១៣៥.០០០ នៅជំរំជម្លៀសខ្លួន លែងអាចប្រើប្រាស់បានទៀតហើយ ដោយសារអាកាសធាតុអាក្រក់ ។

លោក Tareq Abu Azzoum គឺជាអ្នកឆ្លើយឆ្លងព័ត៌មានរបស់កាសែត Al Jazeera បានរាយការណ៍ពីតំបន់ហ្កាហ្សានៅថ្ងៃចន្ទនេះថា ការពិតជាក់ស្តែងរៀបរាប់ពីរឿងរ៉ាវឈឺចាប់មិនអាចកាត់ថ្លៃបាន ។

លោកបន្តថា គ្រួសារជម្លៀសខ្លួនរាប់ម៉ឺននាក់ កំពុងរស់នៅក្នុងសំពត់តង់រហែកប្រក់មេឃ ធ្វើឲ្យពួកគេពិបាកស៊ូទ្រាំ នឹងស្ថានភាពអាកាសធាតុត្រជាក់ និងភ្លៀងធ្លាក់ ។

លោក Abu Azzoum បញ្ជាក់ទៀតថា ការឈឺចាប់បណ្តាលមកដោយផ្ទាល់ពីការរឹតត្បិតរបស់អ៊ីស្រាអែល ពេលដែលពួកគេមិនអនុញ្ញាតឲ្យចូលអង្គភាពសង់ផ្ទះចល័ត និងសម្ភារៈសាងសង់ដែលចាំបាច់សម្រាប់ការការពាររដូវរងា ក៏ដូចជាជំនួយមនុស្សធម៌ ។

ក្រោមបទឈប់បាញ់គាំទ្រដោយសហរដ្ឋអាមេរិក ដែលបានចូលជាធរមានកាលពីថ្ងៃទី ១០ ខែតុលា ឆ្នាំ ២០២៥ ដែលអ៊ីស្រាអែលបំពានរាប់ភ្លេចនោះ ការចែកចាយជំនួយមូលដ្ឋាន ត្រូវតែបង្កើន ក្នុងនោះរថយន្តដឹកជំនួយយ៉ាងហោច ៦០០គ្រឿង ត្រូវអនុញ្ញាតឲ្យចូលក្នុងតំបន់ហ្កាហ្សា ដើម្បីបំពេញតម្រូវការរាល់ថ្ងៃរបស់ជនប៉ាឡេស្ទីននៅទីនោះ ៕