ប្រមុខសិទ្ធិមនុស្សអង្គការសហប្រជាជាតិ(UN)លោក Volker Turk និយាយថា លោកមានការភ្ញាក់ផ្អើលយ៉ាងខ្លាំងពេលឮការរៀបរាប់ដោយផ្ទាល់អំពីអំពើហិង្សាផ្លូវភេទមកលើស្រ្តីនៅក្នុងប្រទេសស៊ូដង់ បន្ទាប់ពីរូបលោកធ្វើដំណើរទៅកាន់ជំរំមួយកន្លែងរបស់មនុស្សភៀសខ្លួន នៅក្នុងប្រទេសមួយនេះ ។ លោកថា អំពើហិង្សាផ្លូវភេទក្នុងសង្រ្គាមស៊ូដង់ មានលក្ខណៈជាសកល និងជាប្រព័ន្ធ ។

ថ្លែងក្នុងសន្និសីទសារព័ត៌មាននៅទីក្រុង Nairobi ប្រទេសកេនយ៉ា ក្រោយដំណើរទស្សនកិច្ចរយៈពេល ៥ថ្ងៃទៅកាន់ប្រទេសស៊ូដង់ លោក Turk និយាយថា ជម្លោះនៅក្នុងប្រទេសស៊ូដង់ បានធ្វើឲ្យប៉ះពាល់ដល់អ្នករាល់គ្នា ហើយសង្រ្គាមមួយនេះ គឺជាទីរហោស្ថានមិនអាចកាត់យល់បាន ។

លោកថា ប្រជាជនបានស៊ូទ្រាំនឹងភាពភ័យរន្ធត់ និងស្ថានភាពដ៏លំបាក ក្នុងសង្រ្គាមដ៏គួរឲ្យស្អប់ខ្ពើមនេះ ហើយមូលនិធិដែលត្រូវប្រើប្រាស់ ដើម្បីកាត់បន្ថយទុក្ខវេទនារបស់ប្រជាជន បែរជាត្រូវបានចំណាយទៅលើអាវុធទំនើបៗទៅវិញ ជាពិសេសយានដ្រូន។

លោក Turk បានបន្តថា បន្ថែមពីលើវិបត្តិអត់ឃ្លាន និងការផ្លាស់ទីលំនៅដ៏ធំបំផុតរបស់ពិភពលោក ប្រទេសស៊ូដង់ ក៏កំពុងប្រឈមនឹងការកើនឡើងនូវយោធាភាវូបនីយកម្មនៅក្នុងសង្គម រួមទាំងតាមរយៈការបំពាក់អាវុធដល់ជនស៊ីវិល និងការជ្រើសរើស និងការប្រើប្រាស់កុមារ ។

ចាប់តាំងពីខែមេសា ឆ្នាំ ២០២៣ ប្រទេសស៊ូដង់ត្រូវបានវាយប្រហារដោយជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលបណ្តាលឲ្យមនុស្សរាប់ម៉ឺននាក់ស្លាប់ និងប្រហែល ១១លាននាក់ ត្រូវបានផ្លាស់ទីលំនៅ ។

យោងតាមការអះអាងរបស់ UN បានឲ្យដឹងថា មនុស្សជាង ២១លាននាក់ កំពុងជួបប្រទះនឹងអសន្តិសុខស្បៀងដ៏ធ្ងន់ធ្ងរ ហើយ ២ភាគ ៣នៃប្រជាជនស៊ូដង់ កំពុងត្រូវការជំនួយមនុស្សធម៌ជាបន្ទាន់ ៕