អត្ថបទបែបវិភាគរបស់ទីភ្នាក់ងារសារព័ត៌មានរ៉យទ័រ បានចេញផ្សាយកាលពីថ្ងៃចន្ទ (១៩ មករា) ថា រុស្ស៊ី កំពុងឈរមើលដោយក្តីរីករាយ ខណៈដែលការជំរុញរបស់លោកប្រធានាធិបតីអាមេរិក Donald Trump ដើម្បីទទួលបានកោះហ្រ្គីនលែន (Greenland) បានពង្រីកភាពបែកបាក់ជាមួយអឺរ៉ុប ទោះបីជាជំហាននេះអាចមានផលវិបាកសន្តិសុខធ្ងន់ធ្ងរសម្រាប់ទីក្រុងមូស្គូក៏ដោយ ដែលក៏ចង់បានវត្តមានរបស់ខ្លួននៅក្នុងតំបន់អាកទិកមួយនេះផងដែរ។

វិមានក្រឹមឡាំង បាននិយាយថា លោក Trump នឹងត្រូវចាឈ្មោះទុកក្នុងប្រវត្តិសាស្ត្រ ប្រសិនបើលោកពិតជាអាចគ្រប់គ្រងហ្រ្គីនលែន ដែលជាទឹកដីស្វយ័តរបស់ដាណឺម៉ាក បានមែននោះ។ លោក Kirill Dmitriev ប្រេសិតពិសេសរបស់លោកប្រធានាធិបតីរុស្ស៊ី Vladimir Putin បានសាទរចំពោះ "ការដួលរលំនៃសហភាពអន្តរអាត្លង់ទិក"។ ចំណែកអតីតប្រធានាធិបតីរុស្ស៊ី លោក Dmitry Medvedev វិញ បាននិយាយចំអកថា អឺរ៉ុបកាន់តែក្រីក្រទៅហើយ។

ការរិះគន់របស់រុស្ស៊ី ចំពោះលោក Trump លើបញ្ហាដែនដីហ្រ្គីនលែននេះ ហាក់មិនសូវមានច្រើននោះទេ ខណៈដែលរុស្ស៊ី ចង់ឱ្យលោកឈរនៅខាងពួកគេ ដើម្បីធានាថា ការបញ្ចប់សង្គ្រាមនៅអ៊ុយក្រែន គឺស្ថិតនៅលើលក្ខខណ្ឌរបស់ទីក្រុងមូស្គូ ទោះបីជាសម្ព័ន្ធមិត្តរុស្ស៊ី ជាប្រពៃណី ដូចជា វ៉េណេស៊ុយអេឡា និងអ៊ីរ៉ង់ កំពុងស្ថិតនៅក្នុងភាពតានតឹងជាមួយអាមេរិកក៏ដោយ។

កាសែតប្រចាំថ្ងៃមួយចំនួនធំរបស់រុស្ស៊ីបាននិយាយថា ជាក្ដីរីករាយណាស់ក្នុងការមើលឃើញអឺរ៉ុប «ខាតបង់ទាំងស្រុង» បន្ទាប់ពីលោក Trump និយាយថា លោកនឹងដំឡើងពន្ធលើទំនិញដែលនាំចូលពីប្រទេសអឺរ៉ុបមួយចំនួន រហូតទាល់តែសហរដ្ឋអាមេរិក ត្រូវបានអនុញ្ញាតឱ្យទិញយកកោះហ្រ្គីនលែន។

ស្របពេលក្ដីត្រេកអរទាំងនេះ ទីក្រុងមូស្គូក៏កំពុងបារម្ភខ្លះដែរ ដោយសារជំហានរបស់លោក Trump ក្នុងការយកកោះនេះទៅគ្រប់គ្រង អាចមានផលប៉ះពាល់ដល់មហិច្ឆតារបស់រុស្ស៊ី នៅក្នុងតំបន់អាកទិក ដែលសម្បូរដោយធនធានធម្មជាតិ និងត្រូវបានរុស្ស៊ី មើលឃើញថា មានសារៈសំខាន់ជាយុទ្ធសាស្ត្រ៕