​វាយ​កូន​បាល់៖ កីឡាករ​វាយ​កូន​បាល់​លំដាប់​លេខ ១ ពិភពលោក​ថ្មី​សញ្ជាតិ​រុស្ស៊ី​ Daniil Medvedev និង​កីឡា​ការិនី​បេឡា​រុស Aryna Sabalenka អំពាវនាវ​រក​សន្តិភាព ​ស្រប​ពេល​ការវាយប្រហារ​ពី​រុស្ស៊ី​លើ​អ៊ុយ​ក្រែ​ន​នៅតែ​បន្ត​។ ​រុស្ស៊ី​បាន​បើក​ការវាយលុក​ចូល​ទឹកដី​អ៊ុយ​ក្រែ​ន​កាលពី​ថ្ងៃទី២៤ ខែកុម្ភៈ​កន្លងទៅ ដែលជា​ការ​វាយ​លុក​លើ​ទ្វីបអឺរ៉ុប​ធំ​បំផុត​តាំងពី​ឆ្នាំ១៩៤៥ ខណៈ​រុស្ស៊ី​បាន​ហៅ​សកម្មភាព​របស់ខ្លួន​ថា​ ជាប្រតិបត្តិការ​យោធា​ពិសេស​។

លោក​ Daniil Medvedev ដែល​ទើប​បានទទួល​តំណែង​លេខ ១ ពិភពលោក​កាលពី​សប្តាហ៍​មុន​បាន​និយាយ​មុន​ព្រឹត្តិការណ៍​ Indian Wells នៅ​សហរដ្ឋអាមេរិក​ថា ខ្ញុំ​ចង់​បាន​សន្តិភាព​ត្រលប់​មកវិញ ខ្ញុំ​ជឿថា ​កីឡាករ-​កីឡាការិនី​គ្រប់រូប​សុទ្ធតែ​ចង់​និយាយ​បែបនេះ​។​ ​ជា​ការពិត​សកម្មភាព​គាំទ្រ​ប្រជាជន​អ៊ុយ​ក្រែ​ន ​បាន​នឹង​កំពុងពុះ​កញ្ជ្រោល​ក្នុង​សហគមន៍​កីឡា​វាយ​កូន​បាល់​។​ ​អតីត​កីឡា​ករលេខ ១ ពិភពលោក​រុស្ស៊ី Maria Sharapova និង​កីឡាករ​ស្កុ​ត​ឡេ​ន Andy Murray បាន​សន្យា​ជួយឧបត្ថម្ភ​ថវិកា​ផ្ទាល់ខ្លួន​ដល់​កុមារ​ ដែល​រងគ្រោះ​ដោយ​ការ​លុកលុយ​នៅ​អ៊ុយ​ក្រែ​ន​។​ ​មនុស្ស​ពីរលាន​នាក់ដែល​ភាគច្រើន​ជា​ស្ត្រី និង​កុមារបាន​ភៀសខ្លួន​ចេញពី​ប្រទេស​អ៊ុយ​ក្រែ​ន​។​

​ចំណែកឯ​កីឡាការិនី​បេឡា​រុស Aryna Sabalenka ដែល​ប្រទេស​កំណើត​របស់ខ្លួន​ទឹកដី​មូលដ្ឋានទ័ព និង​គាំទ្រ យោធា​​រុស្ស៊ី​នោះ ក៏បាន​សំដែង​អារម្មណ៍​សង្វេគ​ចំពោះ​ប្រជាជន​អ៊ុយ​ក្រែ​ន​ផងដែរ ដែល​បាត់បង់​ផ្ទះសំបែង​ដោយសារ​សង្គ្រាម និង​សង្ឃឹមថា​សន្តិភាព​នឹង​ត្រលប់​មកវិញ​ឆាប់ៗ​។ ​ជាធម្មតា​ការប្រកួត​វាយ​កូន​បាល់​ឯកត្តជន កីឡាករ-កីឡាការិនី​មិន​ត្រូវបាន​សង្កត់ធ្ងន់​លើសញ្ជាតិ​របស់ខ្លួន​ឡើយ តែ​កីឡាការិនី Dayana Yastremska ដែល​បាន​ភៀសខ្លួន​ចេញពី​អំពើហិង្សា​ជាមួយ​ប្អូនស្រី​របស់​នាង បាន​ចូលរួម​ប្រកួត​ជុំទី១ របស់​នាង​កាលពី​យប់​ថ្ងៃ​ពុធដោយ​ពាក់​ទង់ជាតិ​អ៊ុយ​ក្រែ​ន​។ Yastremska ដែល​បានឈ្នះ​ពានរង្វាន់ WTA ចំនួន​បី​បាន​សន្យាថា​ នឹង​បរិច្ចាគ​ប្រាក់រង្វាន់​ជើងឯក​រង Lyon Open របស់​នាង​សប្តាហ៍​មុន​ដើម្បី​ជួយ​ដល់​មូលនិធិ​ជំនួយ​សំរាប់​អ៊ុយ​ក្រែ​ន​៕

​អត្ថបទ​៖​នាង សុភា​វុ​ធ