ទាហានរប់សប្រទេសដាណឺម៉ាក បានទៅដល់ជាផ្នែកមួយនៃការធ្វើសមយុទ្ធយោធាភាពអំណត់នៃតំបន់មហាសមុទ្រអាកទិក(Arctic Endurance) នៅតំបន់ Kangerlussuaq ដែនដីGreenland កាលពីល្ងាចថ្ងៃចន្ទ ទី១៩ ខែមករា ខណៈប្រធានាធិបតីសហរដ្ឋអាមេរិក លោក Donald Trump បានបង្កើនការជំរុញរបស់លោកដើម្បីយកមកគ្រប់គ្រងដែនអធិបតេយ្យកោះនៅមហាសមុទ្រអាកទិក ពីប្រទេសដាណឺម៉ាក ដែលជាសមាជិកសម្ព័ន្ធយោធា NATO។

ជម្លោះនេះគំរាមកំហែងដល់ការដួលរលំសម្ព័ន្ធមិត្តNATO ដែលបានគាំទ្រសន្តិសុខលោកខាងលិចរយៈពេលជាច្រើនទសវត្សរ៍មកហើយ និងកំពុងស្ថិតនៅក្រោមភាពតានតឹងរួចទៅហើយជុំវិញសង្គ្រាមនៅអ៊ុយក្រែន និងការបដិសេធរបស់លោកTrump ក្នុងការការពារសម្ព័ន្ធមិត្ត លុះត្រាតែពួកគេបង្កើនការចំណាយលើវិស័យការពារជាតិ។

ការគំរាមកំហែងរបស់លោក Trump បានធ្វើឱ្យឧស្សាហកម្មអឺរ៉ុបរង្គោះរង្គើ និងបានបញ្ជូនរលករង្គោះរង្គើតាមរយៈទីផ្សារហិរញ្ញវត្ថុ។ វិនិយោគិនព្រួយបារម្ភពីការវិលត្រឡប់ទៅរកអស្ថិរភាពនៃសង្គ្រាមពាណិជ្ជកម្មឆ្នាំ២០២៥ ដែលបានធូរស្រាលតែនៅពេលដែលភាគីទាំងអស់ឈានដល់កិច្ចព្រមព្រៀងដំឡើងពន្ធ នៅពាក់កណ្តាលឆ្នាំ។

លោក Trump បានសន្យាថានឹងអនុវត្តរលកនៃការដំឡើងពន្ធចាប់ពីថ្ងៃទី ១ ខែកុម្ភៈ លើសមាជិកសហភាព មានប្រទេសដាណឺម៉ាក ស៊ុយអែត បារាំង អាល្លឺម៉ង់ ហូឡង់ និងហ្វាំងឡង់ រួមជាមួយចក្រភពអង់គ្លេស និងន័រវែស រហូតដល់សហរដ្ឋអាមេរិកត្រូវបានអនុញ្ញាតឱ្យទិញយកមកគ្រប់គ្រងដែនដី Greenland ដែលមានប្រជាជនត្រឹមតែ ៥៧.០០០នាក់ប៉ុណ្ណោះ។