សេចក្ដីរាយការណ៍របស់សារព័ត៌មានអន្តរជាតិជាច្រើន បានឱ្យដឹងកាលពីថ្ងៃចន្ទ (១៩ មករា) ថា បន្ទាប់ពីភាពតានតឹងកើនឡើងខ្លាំងរវាងសហរដ្ឋអាមេរិក និងអ៊ីរ៉ង់ ជុំវិញការបង្ក្រាបដោយហិង្សារបស់ទីក្រុងតេអេរ៉ង់លើការតវ៉ា ក្រុមអ្នកវិភាគព្រមានថា ភាពចលាចលផ្ទៃក្នុងដែលប៉ះពាល់ដល់របបដឹកនាំបែបសាសនារបស់អ៊ីរ៉ង់ អាចបង្កហានិភ័យនៃការរីកសាយភាយនុយក្លេអ៊ែរ។

ក្នុងប៉ុន្មានថ្ងៃមកនេះ លោកប្រធានាធិបតីអាមេរិក Donald Trump ហាក់ដូចជាដកថយពីជម្រើសនៃការវាយប្រហារយោធាលើអ៊ីរ៉ង់ ប៉ុន្ទេលោកបានអំពាវនាវឱ្យបញ្ចប់ការគ្រប់គ្រងជិត ៤០ឆ្នាំ របស់មេដឹកនាំកំពូល លោក Ayatollah Ali Khamenei នៅអ៊ីរ៉ង់។ ការអត្ថាធិប្បាយរបស់លោក Trump ជាការឆ្លើយតបទៅនឹងលោក Khamenei ដែលហៅលោក Trump ថាជា "ឧក្រិដ្ឋជន" និងស្ដីបន្ទោសថា អាមេរិក ជាអ្នកនៅពីក្រោយចលាចលនៅអ៊ីរ៉ង់។

ដោយសារគ្រោះថ្នាក់ជាច្រើន ក្រុមអ្នកវិភាគព្រមានថា សម្ភារៈនុយក្លេអ៊ែររបស់អ៊ីរ៉ង់ ក៏អាចនឹងប្រឈមនឹងហានិភ័យផងដែរ។ លោក David Albright — អតីតអ្នកត្រួតពិនិត្យអាវុធនុយក្លេអ៊ែរនៅអ៊ីរ៉ាក់ និងជាស្ថាបនិកនៃវិទ្យាស្ថានវិទ្យាសាស្ត្រ និងសន្តិសុខអន្តរជាតិមិនស្វែងរកប្រាក់ចំណេញនៅទីក្រុងវ៉ាស៊ីនតោន — បាននិយាយថា ក្នុងសេណារីយ៉ូនៃភាពវឹកវរផ្ទៃក្នុងនៅអ៊ីរ៉ង់ រដ្ឋាភិបាលអាច «បាត់បង់សមត្ថភាពក្នុងការការពារទ្រព្យសម្បត្តិនុយក្លេអ៊ែររបស់ខ្លួន»។

អ្នកជំនាញរូបនេះព្រមានថា ស្តុកអ៊ុយរ៉ានីញ៉ូមដែលចម្រាញ់បានយ៉ាងច្រើនរបស់អ៊ីរ៉ង់ «នឹងក្លាយជារឿងគួរឱ្យបារម្ភបំផុត» ដោយបន្ថែមថា មានលទ្ធភាពដែលថា សម្ភារៈមួយចំនួននោះ «នឹងត្រូវគេលួច» ប្រសិនបើផ្ទៃក្នុងអ៊ីរ៉ង់ វឹកវរខ្លាំង។ ក្រុមអ្នកជំនាញបានលើកឧទាហរណ៍ដូចជា បន្ទាប់ពីការដួលរលំនៃសហភាពសូវៀតក្នុងឆ្នាំ១៩៩១ សារធាតុនុយក្លេអ៊ែរអ៊ុយរ៉ានីញ៉ូម និងភ្លុយតូនីញ៉ូមដ៏គ្រោះថ្នាក់ ដែលសមស្របសម្រាប់បង្កើតគ្រាប់បែកនុយក្លេអ៊ែរ បានបាត់ស្រមោល ដោយសារតែសន្តិសុខចុះខ្សោយ និងការការពារទ្រព្យសម្បត្តិទាំងនេះចុះខ្សោយ៕