​ប្រណាំង​យានយន្ត​៖ ​ការប្រកួតប្រណាំង​យានយន្ត​ឆ្លង​វាល​ខ្សាច់ Abu Dhabi Desert Challenge បាន​ឈាន​ដំណាក់កាល​ទី៤ នៅ​ថ្ងៃ​ពុធ​ម្សិលមិញ​នេះ ​ខណៈដែល​ជ័យជំនះ​បាន​ទៅ​កីឡាករ​កាតា Nasser Al-Attiyah និង​កីឡាករ​អា​ហ្ស​ង់​ទីន Luciano Benavides​។

​​សំរាប់​ការប្រកួត​ផ្នែក​រថយន្ត Nasser Al-Attiyah បាន​យកឈ្នះ ៣ដំណាក់កាល​ជាប់​គ្នា​មកហើយ តែ​កីឡាករ​បារាំង Stephen Peterhansel នៅតែ​បន្ត​នាំមុខគេ​ដដែល និង​ខិតជិត​គ្រង​ជើងឯក Abu Dhabi Desert Challenge នេះ​លើក​ទី៧ ផងដែរ​។​ ​Peterhansel បានបញ្ចប់​នៅ​ចំណាត់ថ្នាក់​លេខ៤ ក្នុង​ដំណាក់​កាល​ទី៤ នេះ តែ​ពន្លាត​វេលា​នាំមុខ​លើអ្នក​លេខ២ ជើងឯក​ឆ្នាំ២០១៨ Martin Prokop ដល់​ទៅ ៣៣នាទី ២១វិនាទី​។

​​ថ្ងៃ​ព្រហស្បតិ៍​នេះ​ជា​ដំណាក់កាល​ចុងក្រោយ​ហើយ ខណៈ Stephen Peterhansel សំឡឹង​ឃើញ​ជើងឯក​លើក​ទី៧ របស់ខ្លួន​ផងដែរ​។ ​ងាក​មក​ការប្រកួត​ផ្នែក​ម៉ូតូ​វិញ ជើងឯក​នៅតែ​ប្រកៀក​ប្រកិត​គ្នា​មិនមាន​អ្នកណា​ឈ្នះ​ដាច់​ឡើយ​ដោយមាន​គំលាត​ពីគ្នា​ត្រឹម ២នាទី ៣៤វិនាទី​ប៉ុណ្ណោះ​ ខណៈ​ជ័យជំនះ​ដំណាក់កាល​ទី៤ បាន​ទៅ​កីឡាករ​អា​ហ្ស​ង់​ទីន Luciano Benavides៕

​អត្ថបទ​៖​នាង សុភា​វុ​ធ