អង្គការសហប្រជាជាតិ កាលពីថ្ងៃចន្ទ (១៩ មករា) បានព្រមានថា ប្រតិបត្តិការមនុស្សធម៌នៅតំបន់ហ្កាហ្សា នៅតែត្រូវបានរារាំងដោយឧបសគ្គនានាដែលកំពុងបន្ត ទោះបីជាកិច្ចព្រមព្រៀងឈប់បាញ់បានកន្លងផុតទៅរយៈពេល ១០០ថ្ងៃក៏ដោយ។

ដោយសម្អាងដល់ការិយាល័យសម្របសម្រួលកិច្ចការមនុស្សធម៌ (OCHA) អ្នកនាំពាក្យអង្គការសហប្រជាជាតិ លោក Farhan Haq បានថ្លែងក្នុងសន្និសីទសារព័ត៌មានមួយថា «កិច្ចព្រមព្រៀងឈប់បាញ់ ដែលឆ្លងកាត់បន្ទាត់ ១០០ថ្ងៃទៅហើយនេះ ត្រូវតែបន្តទៅមុខ ដើម្បីឱ្យជីវិតជនស៊ីវិលកាន់តែច្រើន អាចត្រូវបានសង្គ្រោះ»។ លោកបន្ថែមថា «ការពង្រីកការងារមនុស្សធម៌ នៅតែត្រូវបានរារាំងដោយការរឹតបន្តឹង និងឧបសគ្គ ហើយអាកាសធាតុអាក្រក់ថ្មីៗនេះ ក៏រារាំងវឌ្ឍនភាពមួយចំនួនផងដែរ»។

អ៊ីស្រាអែល និងក្រុមសកម្មប្រយុទ្ធហាម៉ាស បានព្រមព្រៀងគ្នាកាលពីខែតុលា ឆ្នាំមុន ចំពោះផែនការសន្តិភាពជាដំណាក់កាលរបស់សហរដ្ឋអាមេរិក ដែលរួមមានបទឈប់បាញ់ទាំងស្រុង ការដោះដូរចំណាប់ថ្នូរនិងអ្នកទោសប៉ាឡេស្ទីន និងកំណើនជំនួយមនុស្សធម៌ទៅកាន់តំបន់ហ្កាហ្សា។

កិច្ចព្រមព្រៀងនេះរងភាពរង្គោះរង្គើដោយបញ្ហានានា រួមទាំងការវាយប្រហារតាមអាកាសរបស់អ៊ីស្រាអែល ដែលបានសម្លាប់មនុស្សរាប់រយនាក់នៅក្នុងតំបន់ហ្កាហ្សា និងបរាជ័យរបស់ក្រុមហាម៉ាស ក្នុងការរកសាកសពរបស់ចំណាប់ថ្នូរអ៊ីស្រាអែលម្នាក់ចុងក្រោយ ព្រមទាំងការពន្យារពេលរបស់អ៊ីស្រាអែល ក្នុងការបើកច្រកជំនួយនៅព្រំដែនហ្កាហ្សាជាមួយអេហ្ស៊ីប ឡើងវិញ៕