ការស្ទង់មតិមួយ ធ្វើឡើងដោយស្ថាប័ន Randstad ដែលជាភ្នាក់ងារជ្រើសរើសបុគ្គលិកធំជាងគេបំផុតមួយរបស់ពិភពលោក បានបង្ហាញនៅថ្ងៃអង្គារ (២០ មករា) នេះថា បុគ្គលិក ៤នាក់ ក្នុងចំណោម ៥នាក់ ជឿថា បញ្ញាសិប្បនិម្មិត AI នឹងប៉ះពាល់ដល់កិច្ចការប្រចាំថ្ងៃរបស់ពួកគេនៅកន្លែងធ្វើការ ដោយយុវវ័យជំនាន់ក្រោយ Gen Z បានស្ថិតក្នុងចំណោមអ្នកដែលព្រួយបារម្ភបំផុត ខណៈក្រុមហ៊ុនសកលនានាពឹងផ្អែកកាន់តែខ្លាំងឡើងលើបច្ចេកវិទ្យា AI និងស្វ័យប្រវត្តិកម្ម។

ការស្ទង់មតិរបស់ស្ថាប័ន Randstad បានសាកសួរបុគ្គលិកចំនួន ២៧.០០០នាក់ និងនិយោជកចំនួន ១.២២៥នាក់ និងគ្របដណ្តប់លើការប្រកាសជ្រើសរើសបុគ្គលិកជាង ៣លានប្រកាស នៅទូទាំងទីផ្សារសកលចំនួន ៣៥ សម្រាប់របាយការណ៍នេះ។

Randstad បាននិយាយនៅក្នុងរបាយការណ៍ "ការឃ្លាំមើលការងារ" ប្រចាំឆ្នាំរបស់ខ្លួនថា មុខតំណែងទំនេរដែលទាមទារជំនាញ "ភ្នាក់ងារ AI" បានហក់ឡើងយ៉ាងច្រើនដល់ទៅ ១.៥៨៧% ដោយទិន្នន័យស្ទង់មតិបង្ហាញថា បច្ចេកវិទ្យា AI និងស្វ័យប្រវត្តិកម្ម កំពុងជំនួសតួនាទីប្រតិបត្តិការដែលមិនសូវភាពស្មុគស្មាញ កាន់តែខ្លាំងឡើង។

ទីផ្សារការងារកំពុងស្ថិតក្រោមសម្ពាធយ៉ាងខ្លាំង ដោយសាជីវកម្មនានានៅជុំវិញពិភពលោក បង្កើនការបន្ថយបុគ្គលិក ខណៈទំនុកចិត្តអ្នកប្រើប្រាស់ធ្លាក់ចុះ ដែលរងការរំខានដោយសង្គ្រាមពាណិជ្ជកម្មរបស់អាមេរិក និងចលនាគោលនយោបាយការបរទេសដ៏ខ្លាំងក្លារបស់រដ្ឋបាលទីក្រុងវ៉ាស៊ីនតោន។ ក្រុមហ៊ុនបច្ចេកវិទ្យាដែលផ្តោតលើ AI បានចាប់ផ្តើមជំនួសការងារដោយស្វ័យប្រវត្តិកម្ម ប៉ុន្តែក្រុមហ៊ុនភាគច្រើននៅតែរង់ចាំមើលផលចំណេញជាក់ស្តែង ចេញពីការវិនិយោគលើ AI ជំនួសឱ្យមនុស្ស មុនពេលសម្រេចចិត្តកាត់រំសាយបុគ្គលិក៕