កណ្ដាល​៖នៅសាលាខេត្តកណ្តាល រសៀលថ្ងៃទី៩ ខែមីនា ឆ្នាំ២០២២ បានបើកកិច្ចប្រជុំពិភាក្សា “បូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារសម្រាប់អនុវត្តបន្តក្នុងឆ្នាំ២០២២”របស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រចាំខេត្តកណ្តាល ក្រោមកិច្ច​សហការ​រវា​ង​មន្ទីរសុខាភិបាលខេត្ត សហភាពសហព័ន្ធយុវជនកម្ពុជាខេត្ត ជាមួយក្រុមការងារ​គ្រូពេទ្យ​ស្ម័គ្រ​ចិត្ត​ឯកឧត្តម ហ៊ុន ម៉ានី។

កិច្ចប្រជុំខាងលើកនេះ ស្ថិតក្រោមវត្តមាន ឯកឧត្តមបណ្ឌិត ម៉ៅ ភិរុណ ប្រធានក្រុម​ប្រឹក្សា ​ខេត្ត​កណ្តាល ឯកឧត្តម គង់ សោភ័ណ្ឌ អភិបាលខេត្តកណ្តាល ឯកឧត្តម លេង ផាលី រដ្ឋលេខាធិការ​ក្រសួង​ផែនការ និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ប្រធានគណៈកម្មការទី៧រដ្ឋសភា និងជាប្រធាន​កិត្តិ​យស​ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី រួមជាមួយនឹងប្រធានមន្ទីរជុំវិញខេត្ត កងកម្លាំង​ប្រដាប់​អាវុធទាំងបី ក៏ដូចជាសមាជិក សមាជិកានៃក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានីថ្នាក់​កណ្តាល និងខេត្តកណ្តាល ចំនួន៥៥០នាក់។

ឯកឧត្តមវេជ្ជបណ្ឌិត គួយ ប៊ុនធឿន អនុប្រធានប្រតិបត្តិ ទទួលបន្ទុកប្រធានប្រតិបត្តិក្រុមការងារ​គ្រូពេទ្យស្ម័គ្រចិត្តឯកឧត្តម ហ៊ុន ម៉ានី ខេត្តកណ្តាល បានឲ្យដឹងថា កិច្ចប្រជុំនាពេលនេះ ប្រារព្ធឡើង​ក្នុង​គោល​បំណងរួមដើម្បីបន្តចូលរួមលើកកម្ពស់សុខភាពប្រជាជននៅខេត្តកណ្តាល ឱ្យកាន់តែល្អប្រសើរ​ឡើង​ថែមទៀត តាមរយៈការចុះការពិនិត្យ ព្យាបាល បណ្តុះបណ្តាលវិធីសាស្ត្រសង្គ្រោះបឋម ការអប់រំសុខភាព និងផ្តល់ថ្នាំពេទ្យជូនប្រជាពលរដ្ឋដោយឥតគិតថវិកា ដែលជាអំណោយដ៏ថ្លៃថ្លារបស់ឯកឧត្តម ហ៊ុន ម៉ានី​និងជាពិសេសការចូលរួមយុទ្ធនាការ​ចាក់វ៉ាក់​សាំង​បង្ការកូវីដ១៩ ក្នុងក្របខ័ណ្ឌទូទាំង​ប្រទេស​ដោយ​ឥត​គិត​ថ្លៃ ពីសំណាក់ក្រុមការងារគ្រូពេទ្យ​ស្ម័គ្រ​ចិត្ត​ឯកឧត្តម ហ៊ុន ម៉ានី ប្រចាំនៅខេត្តកណ្តាល ដោយមិន​គិតថវិកាបេសកកម្ម។

​ជាមួយគ្នានោះដែរ ឯកឧត្តម លេង ផាលី បានថ្លែងថា ក្នុងបរិបទកូវីដ១៩ ការឆ្លង​រាត​ត្បាត​មេរោគកូវីដ១៩ មិនថាតែប្រទេសកម្ពុជា ក៏ដូចជាបណ្តាប្រទេសនៅលើសកលលោកនោះទេ គឺវ៉ាក់សាំង​បង្ការជំងឺកូវីដ១៩ ជាកត្តាកំណត់ចាំបាច់បំផុត ដែលមិនអាចខ្វះបាន ក្នុងការប្រយុទ្ធប្រឆាំងជំងឺកូវីដ១៩ និងដោយទទួលបានការអនុញ្ញាតដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយក​រដ្ឋមន្រី្តនៃព្រះរាជាណាចក្រកម្ពុជា និងក្រោមការដឹកនាំចង្អុលបង្ហាញផ្ទាល់ពីឯកឧត្តម ប្រធាន ហ៊ុន ម៉ានី ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ត្រូវបានគណៈកម្មការ​ចំពោះកិច្ច​ចាក់វ៉ាក់​សាំង​កូវីដ​១៩ ជ្រើសរើសឲ្យចូលរួមក្នុងយុទ្ធនាការចាក់វ៉ាក់សាំងកូវីដ១៩ នៅក្នុងក្របខណ្ឌទូទាំងប្រទេស​ដោយ​ចេញ​​លិខិតឧទ្ទេសនាមឲ្យបំពេញបេសកកម្មជាបន្តបន្ទាប់។ រហូតមកដល់ពេលនេះក្រុមគ្រូពេទ្យ បានចុះ​បេសកកម្មចាក់វ៉ាក់សាំងបង្ការជំងឺកូវីដ១៩ ជូនប្រជាពលរដ្ឋបានប្រមាណ ៣,៦០១,៣១៤ដូស​(បីលាន​ហុកសិបម៉ឺនមួយពាន់ បីរយដប់បួនដូស) ក្នុង១២រាជធានី-ខេត្ត ក្នុងនោះនៅខេត្តកណ្តាល បានចំនួ​ន​ប្រមាណ​៦០,០៤៥ដូស ស្រី៣០,៩៤៦ដូស។ ជាការពិតការងារពិនិត្យ និងព្យាបាលជំងឺ​ជូនប្រជាពលរដ្ឋ ក្នុងរយៈពេល១០ឆ្នាំ គិតចាប់ពីថ្ងៃបង្កើត (២ធ្នូ ២០១២ ដល់៩មីនា ២០២២) ក្រោមការ​ដឹកនាំ​ចង្អុល​បង្ហាញ​ដោយផ្ទាល់ និងការឧបត្ថម្ភទាំងស្មារតី និងសម្ភារៈពីសំណាក់​ឯកឧត្តម ប្រធាន ហ៊ុន ម៉ានី ក្រុម​ការ​ងារ​​គ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានពិនិត្យ និងព្យាបាលជំងឺ ជូនប្រជាពលរដ្ឋ​បាន​ចំនួន​៣៧១​លើក ដោយមានក្រុមគ្រូពេទ្យស្ម័គ្រចិត្តចូលរួមចំនួន៥,៦៧៩នាក់ ក្នុងនោះស្រី្តមានចំនួន៣២៣១នាក់ បានពិនិត្យ និងព្យាបាល ព្រមទាំងចែកថ្នាំដោយឥតគិតថ្លៃ ជូនប្រជា​ពល​រដ្ឋ បានចំនួន ៤,១៥៨​,​៧៨២​នាក់(បួនលានដប់ប្រាំម៉ឺន ប្រាំបីពាន់ ប្រាំពីររយ ប៉ែតសិប ពីរនាក់) ក្នុង២៥រាជធានី-ខេត្ត។ 

ក្នុងនាមរដ្ឋបាលខេត្តកណ្តាល ឯកឧត្តម គង់ សោភ័ណ្ឌ សូមសម្តែងនូវការកោតសរសើរ និងសូមវាយតម្លៃខ្ពស់ ចំពោះវីរៈភាពដ៏អង់អាចក្លាហាន របស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ខេត្តកណ្តាល ដែលជាកងទ័ពអាវ ស ជួរមុខ ក្នុងការប្រយុទ្ធប្រឆាំងនឹងជំងឺកូវីដ១៩ ដោយបាន​យកចិត្តទុកដាក់ខ្ពស់ក្នុងការព្យាបាល ថ្នាក់ដឹកនាំ មន្រី្តរាជការ កងកម្លាំងប្រដាប់អាវុធ គ្រប់លំដាប់ថ្នាក់ និងប្រជាពលរដ្ឋឲ្យទទួលបានសេវាសុខភាពគ្រប់ជ្រុងជ្រោយ មានគុណភាព សុវតិ្ថភាព និងប្រសិទ្ធភាព ក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ និងការព្យាបាលជំងឺឆ្លង ក៏ដូចជា​ជំងឺ​ផ្សេងៗទៀត ក្នុងភូមិសាស្រ្តខេត្តកណ្តាលនាពេលកន្លងមក។

ជាចុងក្រោយឯកឧត្តមបណ្ឌិត ម៉ៅ ភិរុណ សូមគាំទ្រ និងសហការយ៉ាងពេញ​ទំហឹងចំពោះ​ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ខេត្តកណ្តាល សូមបន្តសកម្មភាពមនុស្សធម៌នេះ ដើម្បីជាប្រយោជន៍ដល់ប្រជាជន និងសង្គមជាតិ ហើយសូមចាត់ទុកកម្មវិធីនេះ ជាកាយវិការមនុស្សធម៌ មិនអាចកាត់ថ្លៃបានក្នុងនាមខ្មែរជួយខ្មែរ និងជាសិល្បៈចែករំលែកដ៏ល្អប្រពៃ និងស្របតាមគោលន​យោ​បាយ​ចតុកោណរបស់រាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋកម្ពុជា៕ អត្ថបទ​៖ រដ្ឋា