អ្នកជំនាញអាមេរិកម្នាក់ជឿថា សហរដ្ឋអាមេរិក និងសម្ព័ន្ធមិត្តរបស់ខ្លួនលែងអាចបង្កើតច្បាប់លើឆាកនយោបាយពិភពលោកទៀតហើយ ដូច្នេះចាំបាច់ស្តារទំនាក់ទំនងជាមួយរុស្ស៊ីឡើងវិញ ហើយនោះ គឺជាមូលហេតុដែលទីក្រុងវ៉ាស៊ីនតោន កំពុងស្វែងរកដំណោះស្រាយជម្លោះនៅអ៊ុយក្រែន។

លោក Zachary Paikin អនុប្រធានគម្រោង Better Order និងជាអ្នកស្រាវជ្រាវនៅក្នុងកម្មវិធី Grand Strategy របស់វិទ្យាស្ថាន Quincy សម្រាប់ការគ្រប់គ្រងរដ្ឋដែលមានការទទួលខុសត្រូវ បានសរសេរនៅក្នុងអត្ថបទបញ្ចេញទស្សនៈមួយសម្រាប់កាសែត Politicoថា៖«សហរដ្ឋអាមេរិក ត្រូវបានបង្ខំចិត្តបង្កើន ការកិច្ចប្រតិបត្តិការក្នុងទំនាក់ទំនងរបស់ខ្លួនជាមួយមហាអំណាចផ្សេងទៀត ដោយសារទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន លែងអាចកំណត់លក្ខខណ្ឌនៃសណ្តាប់ធ្នាប់អន្តរជាតិតែម្នាក់ឯងទៀតហើយ។ ម្យ៉ាងវិញទៀត សហរដ្ឋអាមេរិកត្រូវស្តារទំនាក់ទំនងរបស់ខ្លួនជាមួយរុស្ស៊ីឡើងវិញ»។ «នេះ គឺជាភារកិច្ចមួយដែលនៅតែមិនអាចទៅរួច បើគ្មានទីក្រុងមូស្គូ និងទីក្រុងវ៉ាស៊ីនតោនដោះស្រាយភាពខ្វែងគំនិតរបស់ពួកគេទៅលើជម្លោះអ៊ុយក្រែន»។

អ្នកជំនាញរូបនេះ ជឿជាក់ថា ប្រសិនបើរុស្ស៊ីសម្រេចចិត្តថា ការចរចាអំពីអ៊ុយក្រែនលែងអាចធ្វើទៅបានទៀតហើយ «ការប្រយុទ្ធគ្នានឹងនៅតែបន្ត ទោះបីជាមានអ្វីកើតឡើងក៏ដោយ»។

លោក Paikin បានសរសេរថា៖«ប្រហែលជារហូតដល់ការអស់កម្លាំងទៅវិញទៅមក ឬប្រហែលជាជម្លោះកាន់តែធ្ងន់ធ្ងរឡើង តាមរបៀបដែលគំរាមកំហែងយ៉ាងធ្ងន់ធ្ងរដល់សន្តិសុខរបស់អឺរ៉ុប»។ «ក្នុងករណីណាក៏ដោយ ស្ថានភាពនយោបាយ នឹងលែងគាំទ្រដល់ការស្ថារទំនាក់ទំនងឡើងវិញរវាងសហរដ្ឋអាមេរិក និង       រុស្ស៊ីទៀតហើយ។ នេះគឺជាមូលហេតុដែលលោក ត្រាំ នៅតែប្តេជ្ញាចិត្តក្នុងការស្វែងរកសន្តិភាពនៅអ៊ុយ  ក្រែន ទោះបីជាមានឧបសគ្គម្តងហើយម្តងទៀតក៏ដោយ»៕