គណបក្ស DEM ដែលគាំទ្រឃើដនៅប្រទេសទួរគី បាននិយាយកាលពីថ្ងៃចន្ទថា រដ្ឋាភិបាលទួរគីលែងមានលេស ដើម្បីពន្យារពេលដំណើរការសន្តិភាពជាមួយគណបក្សកម្មករឃើដ (PKK) ដោយសារឥឡូវនេះកិច្ចព្រមព្រៀងសមាហរណកម្មដ៏សំខាន់មួយ ត្រូវបានសម្រេចនៅក្នុងប្រទេសស៊ីរីជិតខាង។

នៅប្រទេសស៊ីរី កាលពីថ្ងៃអាទិត្យ កងកម្លាំងប្រជាធិបតេយ្យស៊ីរី (SDF) ដែលដឹកនាំដោយឃើដ បានយល់ព្រមស្ថិតនៅក្រោមការគ្រប់គ្រងរបស់អាជ្ញាធរ នៅទីក្រុងដាម៉ាស ជាការសម្រេចមួយដែលទីក្រុងអង់ការ៉ា បានស្វែងរកជាយូរមកហើយថា ជាផ្នែកសំខាន់មួយនៃកិច្ចខិតខំប្រឹងប្រែងសន្តិភាពរបស់ខ្លួន ជាមួយ គណបក្សពលករឃើដ (PKK) ។ លោក Tuncer Bakirhan សហមេដឹកនាំនៃគណបក្ស DEM បានប្រាប់សារព័ត៌មានរ៉យទ័រ នៅក្នុងមតិយោបល់សាធារណៈដំបូងមួយចំនួនរបស់គណបក្សនេះអំពីកិច្ចព្រមព្រៀងនៅស៊ីរីថា៖«អស់រយៈពេលជាងមួយឆ្នាំមកនេះ រដ្ឋាភិបាលបានបង្ហាញពីការរួមបញ្ចូលរបស់កងកម្លាំងប្រជាធិបតេយ្យស៊ីរី( SDF) ជាមួយទីក្រុងដាម៉ាសថា ជាឧបសគ្គធំបំផុតចំពោះដំណើរការនេះ»។

«រដ្ឋាភិបាលនឹងលែងមានលេសណាមួយដែលនៅសល់ទៀតហើយ។ ឥឡូវនេះ វាជាវេនរបស់រដ្ឋាភិបាល

ក្នុងការចាត់វិធានការជាក់ស្តែង»។ លោក Bakirhan បានព្រមានរដ្ឋាភិបាលរបស់លោកប្រធានាធិបតី តាយីប អឺដូហ្កាន់ (Tayyip Erdogan) កុំឲ្យសន្និដ្ឋានថា ការកាត់បន្ថយគ្រប់គ្រងទឹកដីរបស់ក្រុមឃើដ នៅក្នុងប្រទេសស៊ីរី បានធ្វើឲ្យប៉ះពាល់តម្រូវការសម្រាប់ដំណើរការសន្តិភាព នៅក្នុងប្រទេសទួរគី។ លោកបាននិយាយនៅក្នុងបទសម្ភាសន៍ថា៖«ប្រសិនបើរដ្ឋាភិបាលគណនាថា យើងបានធ្វើឲ្យក្រុមឃើដនៅក្នុងប្រទេសស៊ីរីចុះខ្សោយ ដូច្នេះលែងមានតម្រូវការសម្រាប់ដំណើរការនៅក្នុងប្រទេសទួរគីទៀតហើយ» វានឹងធ្វើឲ្យមានកំហុសប្រវត្តិសាស្ត្រមួយ»៕