តុលាការឧក្រិដ្ឋកម្មអន្តរជាតិ ឬតុលាការព្រហ្មទណ្ឌអន្តរជាតិ (ICC) កាលពីថ្ងៃចន្ទ (ទី១៩ ខែមករា ឆ្នាំ២០២៦) បានឲ្យដឹងថា ខ្លួនបានរកឃើញភស្តុតាងដែលបង្ហាញថា ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ ត្រូវបានប្រព្រឹត្តនៅក្នុងតំបន់ដាហ្វួរ (Darfur) របស់ប្រទេសស៊ូដង់ ដោយលើកឡើងពីការមានអំពើឃោរឃៅម្តងហើយម្តងទៀតនៅទីក្រុង El Fasher និងការប្រើប្រាស់អំពើហិង្សាផ្លូវភេទជាអាវុធសង្គ្រាម។

រដ្ឋអាជ្ញារងរបស់ ICC លោកស្រី Nazhat Shameem Khan បានប្រាប់ក្រុមប្រឹក្សាសន្តិសុខអង្គការសហប្រជាជាតិ (UNSC) ថា ការវាយតម្លៃរបស់ការិយាល័យ គឺផ្អែកលើទិន្នន័យវីដេអូ ខ្សែអាត់សំឡេង និងផ្កាយរណបដែលប្រមូលបាន ក្នុងអំឡុងពេលធ្វើសេចក្ដីរាយការណ៍។

លោកស្រី Khan បានលើកឡើងថា៖ «ដោយផ្អែកលើព័ត៌មាន និងភស្តុតាងដែលប្រមូលបានដោយការិយាល័យក្នុងរយៈពេលមានសេចក្ដីរាយការណ៍ រួមមានទិន្នន័យវីដេអូ ខ្សែអាត់សំឡេង និងផ្កាយរណប មានការវាយតម្លៃរបស់ការិយាល័យរដ្ឋអាជ្ញាថា ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ ត្រូវបានប្រព្រឹត្តនៅក្នុងទីក្រុង El Fasher រួមទាំងនៅក្នុងខែតុលាផងដែរ ជាពេលដែលមានភាពតានតឹងបំផុតចុងក្រោយនៃការឡោមព័ទ្ធលើទីក្រុងដោយកងកម្លាំងគាំទ្ររហ័ស (RSF)»។

លោកស្រី Khan បានបញ្ជាក់ថា អ្វីៗដែលប្រមូលបានពីវីដេអូបានបង្ហាញពី «គំរូស្រដៀងគ្នានៃឧក្រិដ្ឋកម្មពីមុនដែលត្រូវបានគេចោទប្រកាន់ បានប្រព្រឹត្តដោយកងកម្លាំង RSF នៅក្នុងតំបន់ផ្សេងទៀតរបស់ Darfur ដែលរួមទាំងការឃុំខ្លួន ការរំលោភបំពាន និងការសម្លាប់មនុស្សមកពីកុលសម្ព័ន្ធមិនមែនអារ៉ាប់»។

លោកស្រីបានបន្ថែមថា៖ «ភស្តុតាងបង្ហាញថា គំរូនៃអំពើឃោរឃៅនៅទីក្រុង El Geneina ក្នុងឆ្នាំ២០២៣ ត្រូវបានប្រព្រឹត្តដូចគ្នានៅទីក្រុង El Fasher ក្នុងឆ្នាំ២០២៥។ ឧក្រិដ្ឋកម្មនេះកំពុងត្រូវបានប្រព្រឹត្តពីទីក្រុងមួយទៅទីក្រុងមួយ នៅតំបន់ Darfur»៕