នៅថ្ងៃអង្គារនេះ អារ៉ាប់រួម (UAE) បានបដិសេធយ៉ាងដាច់អហង្ការចំពោះការចោទប្រកាន់ថា អាវុធ គ្រឿងផ្ទុះ និងអ្វីដែលគេហៅថា «ពន្ធនាគារសម្ងាត់» ដែលជាប់ទាក់ទងនឹងអារ៉ាប់រួម ត្រូវបានគេរកឃើញ នៅអាកាសយានដ្ឋានមួយ នៅក្នុងប្រទេសយេម៉ែន។

នៅក្នុងសេចក្តីថ្លែងការណ៍មួយដែលធ្វើឡើងដោយទីភ្នាក់ងារសារព័ត៌មានអារ៉ាប់រួម ក្រសួងការពារជាតិបាននិយាយថា ការអះអាងដែលធ្វើឡើងនៅក្នុងសន្និសីទសារព័ត៌មានដោយអភិបាលខេត្ត Hadramout លោក Salem Al-Khanbashi គឺ «គ្មានការពិត និងនាំឲ្យមានការយល់ច្រឡំ ហើយខ្វះភស្តុតាង ឬមូលដ្ឋានជាក់ស្តែងណាមួយ។

ក្រសួងបាននិយាយថា ការចោទប្រកាន់អំពីពន្ធនាគារនៅអាកាសយានដ្ឋាន Riyan ក្នុងខេត្ត Hadramout បានព្យាយាមបំផ្លាញកេរ្តិ៍ឈ្មោះរបស់កងកម្លាំងប្រដាប់អាវុធអារ៉ាប់រួម។

ក្រសួងបានបញ្ជាក់ជាថ្មីថា កងកម្លាំងអារ៉ាប់រួមបានបញ្ចប់ការដកទ័ពចេញពីប្រទេសយេម៉ែនជាផ្លូវការ និងជាសាធារណៈ កាលពីថ្ងៃទី ០២ ខែមករា រួមទាំងការបញ្ជូននូវសម្ភារៈ អាវុធ និងគ្រឿងយុទ្ធោបករណ៍ ទាំងអស់ ដោយមិនបន្សល់ទុកវត្តមានយោធា ភស្តុភារ ឬបច្ចេកទេសរបស់អារ៉ាប់រួម នៅក្នុងប្រទេសនោះទេ។

ក្រសួងបាននិយាយថា សម្ភារៈទាំងនោះរួមមាន កន្លែងស្នាក់នៅយោធា បន្ទប់ប្រតិបត្តិការ និងជម្រកដែលមានកំពែងរឹងមាំ ដែលខ្លះមានទីតាំងនៅក្រោមដី សម្ភារៈសំខាន់ៗដែលខ្លួនបាននិយាយ ជារឿងធម្មតានៅក្នុងអាកាសយានដ្ឋាន និងមូលដ្ឋានយោធា នៅទូទាំងពិភពលោក៕