ហ្ស៊កដានី៖ នគរបាលបង្ក្រាបកុបកម្មបានប៉ះទង្គិចគ្នា ជាមួយក្រុមអ្នកតវ៉ារាប់រយនាក់នៅក្នុងទីក្រុងអាម៉ង់កាលពីថ្ងៃច័ន្ទ ដែលបានប្រមូលផ្ដុំគ្នាប្រឆាំងនឹងបម្រាមគោចរ ពេលល្ងាចនៅក្នុងរាជធានីរបស់ប្រទេសហ្ស៊កដានី។ កងកម្លាំងសន្តិសុខបានប្រើឧស្ម័នបង្ហូរទឹកភ្នែកដើម្បីបញ្ចប់បាតុកម្ម ដោយក្រុមបាតុករដែលបានផ្ទុះកំហឹងផងដែរ ដោយសារការស្លាប់អ្នកជំងឺវីរុសកូរ៉ូណាយ៉ាងហោចណាស់ ៧នាក់នៅមន្ទីរពេទ្យមួយកន្លែង ព្រោះកង្វះការផ្គត់ផ្គង់អុកស៊ីសែន។
ក្រុមអ្នកតវ៉ាដែលបានបំពានបម្រាមគោចរពេលយប់នៅយប់ទី៣ បានអំពាវនាវឲ្យរដ្ឋាភិបាលរបស់លោកនាយករដ្ឋមន្ត្រី Bishr al-Khasawneh ចុះចេញពីតំណែង។ សារព័ត៌មានរដ្ឋហ្ស៊កដានីបានរាយការណ៍ថា កាលពីថ្ងៃសៅរ៍កន្លងទៅនេះ រដ្ឋមន្ត្រីសុខាភិបាលហ្ស៊កដានី លោក Nathir Obeidat បានលាលែងពីតំណែង បន្ទាប់ពីអ្នកជំងឺ ៧នាក់បានស្លាប់នៅមន្ទីរពេទ្យជិតរាជធានីអាម៉ង់ ដោយសារកង្វះការផ្គត់ផ្គង់អុកស៊ីសែន។ កាលពីថ្ងៃសៅរ៍ រដ្ឋាភិបាលបានរឹតបន្តឹងវិធានការរឹតត្បិត និងអនុវត្តន៍វិធានការបិទថ្ងៃចុងសប្ដាហ៍ និងបម្រាមគោចរពេលយប់ ដើម្បីទប់ស្កាត់ការឆ្លងរាលដាលវីរុស COVID-19។
កាលពីថ្ងៃច័ន្ទ ប្រទេសហ្ស៊កដានីបានកត់ត្រាចំនួនអ្នកឆ្លងវីរុសខ្ពស់បំផុត ចាប់តាំងពីជំងឺរាតត្បាតសកលចាប់ផ្ដើមផ្ទុះ ដោយមានករណីឆ្លងថ្មី ៩,៤១៧នាក់ ដែលនាំឲ្យអ្នកឆ្លងសរុបហក់ឡើងដល់ ៤៨៦,៤៧០នាក់។ ប្រទេសនេះក៏បានកត់ត្រាករណីស្លាប់ចំនួន ៨២នាក់ផងដែរ ជាចំនួនអ្នកស្លាប់ខ្ពស់ជាងគេបំផុតក្នុង ១ថ្ងៃ ដែលនាំឲ្យមានអ្នកស្លាប់សរុបកើនឡើងដល់ ៥,៤២៨នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
