អ្នកនាំពាក្យជាន់ខ្ពស់របស់រដ្ឋាភិបាល នៅថ្ងៃអង្គារ (ទី២០ ខែមករា ឆ្នាំ២០២៦) នេះ បានប្រាប់ឲ្យដឹងថា រដ្ឋាភិបាលជប៉ុន បានដាក់បម្រាមទាំងស្រុងមិនឲ្យមានការរៃអង្គាសថវិកានយោបាយដោយរដ្ឋមន្ត្រី ខណៈដែលនាយករដ្ឋមន្ត្រីជប៉ុន លោកស្រី Sanae Takaichi កំពុងត្រៀមខ្លួន សម្រាប់ការបោះឆ្នោតសភាតំណាងរាស្ត្រមុនអាណត្តិ ដែលគ្រោងធ្វើឡើងនៅខែកុម្ភៈ។

ការកែប្រែក្រមរបស់រដ្ឋមន្ត្រីដែលត្រូវបានអនុម័តដោយគណៈរដ្ឋមន្ត្រី ហាមឃាត់រដ្ឋមន្ត្រីមិនឲ្យរៃអង្គាសថវិកាគ្រប់ទំហំ ជាការផ្លាស់ប្តូរពីច្បាប់មុនៗដែលគ្រាន់តែជំរុញឲ្យចៀសវាងការរៃអង្គាសថវិកាក្នុងចំនួនច្រើន ដោយមិនកំណត់កម្រិតតួលេខឡើយ។

នាយខុទ្ទកាល័យ លោក Minoru Kihara បានបញ្ជាក់ថា ការហាមឃាត់នេះត្រូវបានធ្វើឡើង «ដោយពិចារណាលើចេតនាពិត» របស់ក្រមនេះ ដែលលោកបាននិយាយថា មានបំណង «រក្សាសុចរិតភាព និងធានាដល់ទំនុកចិត្តរបស់សាធារណជន ក្នុងនយោបាយ និងរដ្ឋបាល»។

ក្រមរដ្ឋមន្ត្រីរបស់ជប៉ុននេះ អនុវត្តចំពោះរដ្ឋមន្ត្រីគណៈរដ្ឋមន្ត្រី អនុរដ្ឋមន្ត្រីជាន់ខ្ពស់ និងអនុរដ្ឋមន្ត្រីសភា។ ការផ្លាស់ប្តូរ នៅមុនការបោះឆ្នោត ដែលគ្រោងធ្វើឡើងនៅថ្ងៃទី៨ ខែកុម្ភៈ អាចមានគោលបំណងបញ្ជាក់ឲ្យឃើញថា លោកស្រី Takaichi មានជំហរសកម្មជាមុន ស្ដីពីកំណែទម្រង់នយោបាយ។

គណបក្សប្រជាធិបតេយ្យសេរីរបស់លោកស្រី បានប្រឈមនឹងការត្រួតពិនិត្យ ពាក់ព័ន្ធនឹងបញ្ហានេះ ចាប់តាំងពីករណីនេះបានលេចឡើងនៅចុងឆ្នាំ២០២៣ ដែលថា ក្រុមមួយចំនួនរបស់គណបក្ស មិនបានរាយការណ៍ពីប្រាក់ចំណូលបានពីព្រឹត្តិការណ៍រៃអង្គាសថវិកា ដែលបង្កើតជាមូលនិធិកខ្វក់៕