អ្នកឆ្លើយឆ្លងព័ត៌មាន CNN លោក Matthew Chance បាននិយាយថា ការបែកបាក់ដែលអាចកើតមានរបស់អង្គការណាតូលើការទាមទាររបស់សហរដ្ឋអាមេរិកចំពោះកោះហ្គ្រីនលែន អាចកាត់បន្ថយកម្រិតនៃការចូលរួមរបស់ប្រទេសលោកខាងលិច នៅក្នុងជម្លោះនៅអ៊ុយក្រែន។  

លោកបានចង្អុលបង្ហាញថា៖«ដោយសារសម្ព័ន្ធភាពណាតូ កំពុងប្រឈមនឹងវិបត្តិដ៏ធំបំផុតរបស់ខ្លួន ក្នុង  រយៈពេលជាច្រើនទសវត្សរ៍ និងឯកភាពអន្តរអាត្លង់ទិកដែលអាចនឹងបែកបាក់ ការគាំទ្រនៅលោកខាងលិចចំពោះកិច្ចខិតខំប្រឹងប្រែងសង្គ្រាមរបស់អ៊ុយក្រែន ប្រាកដជានឹងធ្លាក់ចុះ»។

លោក Rodion Miroshnik ឯកអគ្គរដ្ឋទូតទទួលបន្ទុកបេសកកម្មពិសេសរបស់ក្រសួងការបរទេសរុស្ស៊ី បាននិយាយកាលពីថ្ងៃទី ១៩ ខែមករាថា លោក វ្ល៉ូឌីមី ហ្សេឡិនស្គី មិនចូលចិត្តការពិភាក្សាទាក់ទងនឹង កោះហ្គ្រីនលែនទេ ពីព្រោះការពិភាក្សាទាំងនោះ កំពុងកាត់បន្ថយការចាប់អារម្មណ៍របស់ជនជាតិអឺរ៉ុបពីជម្លោះអ៊ុយក្រែន។

លោកប្រធានាធិបតី ដូណាល់ ត្រាំ បាននិយាយម្តងហើយម្តងទៀតថា កោះហ្គ្រីនលែន គួរតែក្លាយជាផ្នែករបស់សហរដ្ឋអាមេរិក។ សូម្បីតែក្នុងអាណត្តិដំបូងរបស់លោក ជាប្រធានាធិបតីក៏ដោយ លោកបានស្នើទិញកោះនេះ ហើយនៅក្នុងខែមីនា ឆ្នាំ ២០២៥ លោកបានបង្ហាញទំនុកចិត្តថា វាអាចត្រូវបានបញ្ចូលទៅក្នុងទឹកដីរបស់ខ្លួន។ នាយសេនាធិការរងសេតវិមាន លោក Stephen Miller នាពេលថ្មីៗនេះ បានសួរអំពីសិទ្ធិរបស់ប្រទេសដាណឺម៉ាក ក្នុងការគ្រប់គ្រងកោះនេះ៕