នៅថ្ងៃអង្គារ (ទី២០ ខែមករា ឆ្នាំ២០២៦) ក្រុមអ្នកពន្លត់អគ្គិភ័យ កំពុងនាំគ្នាសម្អាតបំណែកបាក់បែកនៃអគារនៅផ្សារទំនើបមួយ ក្នុងទីក្រុង Karachi របស់ប្រទេសប៉ាគីស្ថាន ខណៈដែលពួកគេបានព្យាយាមស្វែងរកមនុស្ស ៦៣នាក់ដែលនៅតែបាត់ខ្លួន បន្ទាប់ពីមានអគ្គិភ័យដែលបានឆាបឆេះជិត ២ថ្ងៃ និងបានសម្លាប់មនុស្សយ៉ាងតិច ២១នាក់។

នគរបាលបានឲ្យដឹងថា អ្នកបាត់ខ្លួនភាគច្រើន ត្រូវបានគេបារម្ភថា នឹងមិនមានជីវិតរស់នៅឡើយ ហើយក្រុមអ្នកជួយសង្គ្រោះ កំពុងព្យាយាមស្វែងរកសាកសពតាមគំនរបាក់បែកដែលត្រូវបានឆេះខ្ទេចខ្ទីនេះ។

អគ្គិភ័យដ៏ធំបំផុតជាលើកដំបូងរបស់ទីក្រុងនេះ ក្នុងរយៈពេលជាង ១ទសវត្សរ៍ បានចាប់ផ្តើមកាលពីយប់ថ្ងៃទី១៧ ខែមករា ហើយបានរីករាលដាលយ៉ាងឆាប់រហ័ស នៅទូទាំងផ្សារទំនើប Gul Plaza ដែលត្រូវបានគេស្គាល់ដោយសារមានហាងចំនួន ១.២០០ គ្រប់គ្រងដោយគ្រួសារ ដែលលក់សម្លៀកបំពាក់អាពាហ៍ពិពាហ៍ ប្រដាប់ក្មេងលេង ចានឆ្នាំង និងរបស់របរជាច្រើនទៀត។

ក្រុមអ្នកពន្លត់អគ្គិភ័យ បានប្រឹងប្រយុទ្ធប្រឆាំងនឹងការឆាបឆេះដែលបានបង្កើតជាអណ្ដាតភ្លើងដ៏សន្ធោរសន្ធៅនៅក្នុងផ្សារទំនើបពេញមួយយប់ និងឆ្លងចូលយប់ថ្ងៃទី១៨ ខែមករា មុនពេលគ្រប់គ្រងអគ្គិភ័យនោះបាន ទោះបីជាចំហេះតូចៗនៅតែបន្តមានទូទាំងបំណែកបាក់បែកនៃអគារនេះក៏ដោយ។

ភាគច្រើននៃរចនាសម្ព័ន្ធសំណង់ដ៏រឹងមាំមួយ ដែលមានទំហំធំជាងទីលានបាល់ទាត់ ត្រូវបានធ្វើឲ្យក្លាយទៅជាគំនរផេះ និងកម្ទេចកម្ទីរាយប៉ាយពាសពេញផ្លូវ ខណៈដែលក្រុមជួយសង្គ្រោះ បានស្វែងរកមនុស្សដែលកំពុងបាត់ខ្លួនកាន់តែច្រើនឡើងៗ។

លោក Rizwan Ahmed មកពីក្រុមជួយសង្គ្រោះ Rescue 1122 បាននិយាយនៅថ្ងៃទី២០ ខែមករានេះថា មនុស្ស ២១នាក់ បានបាត់បង់ចីវិតនៅក្នុងអគ្គិភ័យនេះ ខណៈពេលដែល ៦៣នាក់ផ្សេងទៀតនៅតែបាត់ខ្លួន ពោលគឺមានរយៈពេលជិត ៣ថ្ងៃហើយ បន្ទាប់ពីហេតុការណ៍នេះបានចាប់ផ្តើមឡើង៕