កងកម្លាំងអ៊ីស្រាអែល បានបញ្ជាឲ្យគ្រួសារប៉ាឡេស្ទីនរាប់សិបគ្រួសារនៅភាគខាងត្បូងតំបន់ហ្កាហ្សាស្ទ្រីប ចាកចេញពីផ្ទះសម្បែងរបស់ពួកគេ ដែលជាការឲ្យជម្លៀសដោយបង្ខំលើកដំបូង គិតចាប់តាំងពីមានបទឈប់បាញ់កាលពីខែតុលាឆ្នាំមុន ខណៈដែលអ្នកស្រុក និងក្រុមហាម៉ាស បានឲ្យដឹងនៅថ្ងៃអង្គារ (ទី២០ ខែមករា ឆ្នាំ២០២៦) នេះថា យោធាកំពុងពង្រីកតំបន់ស្ថិតនៅក្រោមការគ្រប់គ្រងរបស់ខ្លួន។

អ្នកស្រុកទីក្រុង Bani Suhaila នៅភាគខាងកើតនៃទីក្រុង Khan Younis បានឲ្យដឹងថា កាលពីថ្ងៃចន្ទ ខិត្តប័ណ្ណត្រូវបានទម្លាក់ចូលទៅក្រុមគ្រួសារដែលរស់នៅក្នុងជំរំតង់ នៅសង្កាត់ al-Reqeb។ ខិត្តប័ណ្ណជាភាសាអារ៉ាប់ ហេព្រើរ និងអង់គ្លេស ដែលកងទ័ពបានទម្លាក់នៅសង្កាត់ al-Reqeb ក្នុងទីក្រុង Bani Suhaila បានសរសេរថា៖ «សារបន្ទាន់។ តំបន់នេះស្ថិតនៅក្រោមការគ្រប់គ្រងរបស់ IDF (កងកម្លាំងការពារជាតិអ៊ីស្រាអែល)។ អ្នកត្រូវតែជម្លៀសចេញជាបន្ទាន់»។

គួរបញ្ជាក់ថា នៅក្នុងសង្គ្រាមរយៈពេល ២ឆ្នាំ មុនពេលដែលបទឈប់បាញ់សម្របសម្រួលដោយសហរដ្ឋអាមេរិក ត្រូវបានចុះហត្ថលេខាក្នុងខែតុលា អ៊ីស្រាអែលបានទម្លាក់ខិត្តប័ណ្ណលើតំបន់នានា ដែលតែងត្រូវបានវាយឆ្មក់ ឬទម្លាក់គ្រាប់បែកជាបន្តបន្ទាប់ ដែលបង្ខំឲ្យគ្រួសារមួយចំនួនផ្លាស់ទីលំនៅជាច្រើនដង។

អ្នកស្រុក និងប្រភពមួយមកពីក្រុមសកម្មប្រយុទ្ធហាម៉ាស បានឲ្យដឹងថា នេះជាលើកដំបូងហើយដែលមានការទម្លាក់ខិត្តប័ណ្ណ ចាប់តាំងពីពេលនោះមក។ យោធាអ៊ីស្រាអែលមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕