ឯកសារបង្ហាញនៅថ្ងៃអង្គារនេះថា ក្រុមប្រឹក្សាសិទ្ធិមនុស្សអង្គការសហប្រជាជាតិ(UN) នឹងមាននូវជំនួបបន្ទាន់មួយនៅថ្ងៃសុក្រ ទី ២៣ ខែមករា ខាងមុខនេះ ដើម្បីពិភាក្សាលើអំពើហិង្សាគួរឲ្យព្រួយបារម្ភ ដែលត្រូវបានប្រើប្រាស់លើក្រុមបាតុករ ។

មន្រ្តីអ៊ីរ៉ង់និយាយថា ក្រុមអាជ្ញាធរបានបញ្ជាក់ផ្ទៀងផ្ទាត់មនុស្សស្លាប់យ៉ាងហោច ៥ពាន់នាក់ នៅក្នុងបាតុកម្ម ដែលជាការតវ៉ាធំបំផុត ចាប់តាំងពីឆ្នាំ ២០២២ បង្ខំឲ្យប្រធានសិទ្ធិមនុស្ស UNលោក Volker Turk ថ្កោលទោសអំពើហិង្សានេះ ។

យោងតាមលិខិតមួយច្បាប់សរសេរដោយឯកអគ្គរដ្ឋទូតអៀរឡង់លោក Einar Gunnarsson តំណាងឲ្យក្រុមប្រទេសរួមទាំងប្រទេសអាល្លឺម៉ង់ និងអង់គ្លេសដែរនោះ ហើយត្រូវបានមើលឃើញដោយទីភ្នាក់ងារព័ត៌មានរ៉យទ័រ បានឲ្យដឹងថា កិច្ចប្រជុំពិសេសត្រូវការជាចាំបាច់ ដោយសារៈសំខាន់ និងភាពបន្ទាន់នៃស្ថានភាព ជាពិសេសដោយសាររបាយការណ៍អាចទុកចិត្តបាន បញ្ជាក់ពីអំពើហិង្សាគួរឲ្យព្រួយបារម្ភ ។

UN បញ្ជាក់ថា កិច្ចប្រជុំពិសេសនេះ នឹងត្រូវធ្វើឡើងនៅថ្ងៃសុក្រ ដោយមានប្រទេសចំនួន ២១ បានគាំទ្រសំណើមួយនេះ ។

ខណៈពេលនោះដែរ ក្រុមសិទ្ធិមនុស្សបានបរិហារការសម្លាប់ខុសច្បាប់ទ្រង់ទ្រាយធំ ហើយនិងបានស្នើសុំឲ្យការស៊ើបអង្កេតមានស្រាប់របស់ UN ដែលត្រូវបានធ្វើឡើងដោយក្រុមប្រឹក្សាកាលពីឆ្នាំ ២០២២ ក្រោយរលកចុងក្រោយនៃបាតុកម្ម បន្តស្វែងរកយុត្តិធម៌ជុំវិញករណីស្លាប់របស់ក្រុមបាតុករ ៕