ចក្រភពអង់គ្លេស កំពុងពិចារណាដាក់ចេញនូវការហាមឃាត់មិនប្រើប្រាស់បណ្ដាញសង្គម តាមគំរូរបស់ប្រទេសអូស្ត្រាលី ដើម្បីការពារកុមារនៅលើប្រព័ន្ធអ៊ីនធឺណិតឲ្យបានកាន់តែល្អប្រសើរ ដោយនាយករដ្ឋមន្ត្រី លោក Keir Starmer បានព្រមាននៅថ្ងៃអង្គារ (ទី២០ ខែមករា ឆ្នាំ២០២៦) នេះថា ក្មេងៗ កំពុងប្រឈមនឹងហានិភ័យ ក្នុងការអូសទាញចូលទៅក្នុង «ពិភពនៃការអូសចុះ-អូសឡើង ការថប់បារម្ភ និងការប្រៀបធៀបឥតឈប់ឈរ»។

លោក Starmer បានបញ្ជាក់ថា រដ្ឋាភិបាលបានត្រៀមរួចជាស្រេច ដើម្បីចាត់វិធានការដ៏ខ្លាំងក្លា មួយថ្ងៃបន្ទាប់ពីបានលើកឡើងថា រដ្ឋបាលរបស់លោក នឹងពិនិត្យមើលថា តើវេទិកា ដូចជាការអូសចុះ-អូសឡើងឥតឈប់ឈរនេះ និងអាយុដែលកុមារអាចចូលទៅប្រើវេទិកានានា គួរតែត្រូវបានរឹតបន្តឹងដែរ ឬយ៉ាង។

រដ្ឋាភិបាដឹកនាំដោយគណបក្សការងារនេះ បានសង្កត់ធ្ងន់ថា ខ្លួននឹងពិនិត្យមើលភស្តុតាង ពីជុំវិញពិភពលោក ពាក់ព័ន្ធនឹងសំណើដែលបានលើកឡើង ក្នុងនោះរួមមានទាំងការពិនិត្យមើលថា តើការហាមឃាត់មិនឲ្យប្រើប្រាស់បណ្ដាញសង្គម សម្រាប់កុមារ នឹងមានប្រសិទ្ធភាពដែរ ឬអត់ និងថា តើវិធីល្អបំផុតយ៉ាងដូចម្ដេច ដើម្បីធ្វើឲ្យបម្រាមបែបនេះ ត្រូវបានអនុវត្ត ប្រសិនបើវាត្រូវបានដាក់ចេញ។

លោក Starmer បានលើកឡើងនៅលើវេទិកាបង្ហោះព័ត៌មាន Substack ថា៖ «នេះគឺជាបញ្ហាស្មុគស្មាញខ្លាំងណាស់។ ដូច្នេះ វាគឺសំខាន់ណាស់ដែលតម្រូវឲ្យមានការពិចារណាយ៉ាងត្រឹមត្រូវ»។

ប្រទេសនេះបានឲ្យដឹងកាលពីថ្ងៃចន្ទថា រដ្ឋមន្ត្រីនឹងទៅទស្សនកិច្ចនៅអូស្ត្រាលី ដែលកាលពីខែមុន បានក្លាយជាប្រទេសដំបូងគេអនុវត្តការហាមឃាត់មិនឲ្យប្រើបណ្ដាញសង្គម សម្រាប់កុមារអាយុក្រោម ១៦ឆ្នាំ ដើម្បីរៀនសូត្រពីវិធីសាស្រ្តរបស់ពួកគេ៕