​គុន​ចម្រុះ៖ អ្នកលេង​គុន​ចម្រុះ​កម្ពុជា ចាន់ រតនា និង​អ្នកលេង​គុន​ចម្រុះ​ឥណ្ឌូនេស៊ី Eko Roni Saputra នឹងត្រូវ​ជួបគ្នា​ក្នុង​ព្រឹត្តិការណ៍ ONE: LIGHT OUT នៅ​ប្រទេស​សិង្ហ​បុរីនៅ​ថ្ងៃទី​១១ ខែមីនា​នេះ ខណៈ​អ្នក​ទាំងពីររំពឹងថា ការប្រកួត​ល្ងាច​នេះនឹងមិន​ចប់ ៣​ទឹក​ឡើយ។​

​សម្រាប់​កីឡាករ Eko Roni បានចាត់ទុក ចាន់ រតនា គឺជា​ដៃគូ​ដ៏​ខ្លាំង​បំផុត​ក្នុង​អាជីព​ប្រដាល់​គុន​ចម្រុះ​របស់ខ្លួន ហើយ​គេ​បានដាក់​គោលដៅ​ចង់​ឈ្នះ​ជើង​ខ្លាំង​គុន​ខ្មែរ​រូបនេះ ដើម្បី​ដំណើរ​ឆ្ពោះទៅកាន់ក្នុងចំណោម​កីឡាករ​ជើង​ខ្លាំង​លំដាប់​កំពូល​ទាំង ៥ នៃ​ប្រភេទ​ទម្ងន់ Flyweight។​ Eko Roni បាន​កោត​សរសើរ​ចំពោះ​ជំនាញ និង​ភាពជោគជ័យ​ក្នុង​ប្រដាល់​គុន​ខ្មែរ​របស់ ចាន់ រតនា តែ​រូបគេ​ថាមិន​បារម្ភ​ចំពោះ​ក្បាច់​វ៉ៃ​ឈរ ដូចជា​ការប្រើ​កណ្ដាប់ដៃ ឬ​ទាត់​របស់ រតនា ឡើយ លើសពីនេះ Roni ថែមទាំង​ប្ដេជ្ញា​បញ្ឈប់​អ្នកលេង​គុន​ចម្រុះ​កម្ពុជា​ពាក់កណ្ដាល​ផ្លូវ​ទៀតផង។​ ​ដោយឡែក ចាន់ រតនា បានបង្ហាញ​ចំណាប់អារម្មណ៍​មុន​ការប្រកួត​ថា ការប្រកួត​នេះប្រើពេល​យ៉ាងយូរ​ត្រឹម ២​ទឹក​ប៉ុណ្ណោះ តែ​ខ្លួន​មិន​ហាន​អះអាងថា នរណា​បញ្ឈប់​នរណា​នោះទេ ប៉ុន្ដែ​រូបគេ​តែង​ផ្ដល់​កម្លាំងចិត្ត​ឲ្យ​ខ្លួនឯងដោយ​សង្ឃឹម​យកឈ្នះ ១០០% ក្នុងការ​ប្រកួត​នេះ។​

​ទន្ទឹម​ជាមួយគ្នា រតនា បាន​ផ្ដាំ​ទៅ​អ្នកជំនាញ​ចំបាប់​ឥណ្ឌូនេស៊ី​ថា ប្រិ​សន​បើ Eko Roni ចង់​ឡើងទៅ​កាន់​លំដាប់​កំពូល​ទាំង ៥ គឺ​ត្រូវ​ឆ្លងកាត់​ខ្លួន​ឲ្យ​ផុត​សិន។ អ្នកលេង​គុន​ខ្មែ​រូបនេះបាន​ប្ដេជ្ញា​នឹងធ្វើ​ការរារាំង Roni ដោយ​នឹង​ឲ្យ​អាជ្ញាកណ្ដាល​លើកដៃ​ខ្លួន​ឡើងលើ​ក្នុង​ការប្រកួត​នេះ។​ ​កីឡាករ​វ័យ ៣៦​ឆ្នាំ​ដដែលបាន​បន្ថែមថា ការប្រកួត​នេះពិតជា​សំខាន់ដែល​ខ្លួន​ទាមទារ​ជ័យជម្នះ​ដាច់ខាត ព្រោះ​ប្រកួត​ចុងក្រោយខ្លួន​បាន​ចាញ់​កីឡាករ​ចិន Xie Wei។ ដូច្នេះ​អ្វីដែល​ខ្លួន​ត្រូវ​ខ្វល់ មិនមែនជា​ការរក្សា​កំណត់ត្រា​ឈ្នះ​លើ​កីឡាករ​ឥណ្ឌូនេស៊ី ឬ​សង​សឹង​អ្វី​នោះទេគឺ​ការយក​ឈ្នះ Eko Roni ឲ្យ​ខាន​តែ​បាន៕

​អត្ថបទ៖ លី ឈុន​ឡា