កិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) ឆ្នាំ២០២៦ បានបើកកាលពីថ្ងៃចន្ទដើមសប្ដាហ៍នេះ នៅទីក្រុងដាវ៉ូស ប្រទេសស្វីស ដោយបាននាំវត្តមានរបស់អ្នកតំណាងជិត ៣.០០០នាក់ មកពីប្រទេស និងតំបន់ជាង ១៣០។ស្របពេលមានហានិភ័យសកលកើនឡើងខ្លាំង និងកំណើនយឺត អ្នកចូលរួមបានប្រមូលផ្តុំគ្នាដើម្បីពិភាក្សាអំពីបញ្ហាជាច្រើននាពេលបច្ចុប្បន្ន។  

ស្របពេលភាពស្មុគស្មាញខាងភូមិសាស្ត្រនយោបាយដែលកំពុងកើនឡើង ការបែកបាក់កាន់តែស៊ីជម្រៅ និងការផ្លាស់ប្តូរបច្ចេកវិទ្យាយ៉ាងឆាប់រហ័ស វេទិកានេះបានអំពាវនាវដល់សហគមន៍អន្តរជាតិឱ្យភ្ជាប់ការខ្វែងគំនិតគ្នាតាមរយៈការសន្ទនា សម្លឹងមើលទៅអនាគត និងធ្វើការរួមគ្នាដើម្បីដោះស្រាយបញ្ហាប្រឈមសកលធំៗ។ 

ពិភពលោកបច្ចុប្បន្នកំពុងព្យាយាមដោះស្រាយហានិភ័យចម្រុះ ដែលកំពុងដាក់ភាពតានតឹងមិនធ្លាប់មានលើស្ថិរភាព និងការអភិវឌ្ឍសកល។

របាយការណ៍ហានិភ័យសកលឆ្នាំ២០២៦របស់ WEF មួយក្នុងចំណោមការចេញផ្សាយសំខាន់ៗរបស់ខ្លួនមុនកិច្ចប្រជុំប្រចាំឆ្នាំ ចង្អុលបង្ហាញថា ហានិភ័យភូមិសាស្ត្រនយោបាយ និងសេដ្ឋកិច្ចកំពុងកើនឡើងនៅក្នុងយុគសម័យថ្មីនៃការប្រកួតប្រជែង។

លោកស្រី Saadia Zahidi នាយិកាគ្រប់គ្រងវេទិកាសេដ្ឋកិច្ចពិភពលោក បានលើកឡើងថា យុគសម័យនៃការប្រកួតប្រជែងនេះ បានបង្កើនហានិភ័យសកល ចាប់ពីការប្រឈមដាក់គ្នាខាងភូមិសាស្ត្រសេដ្ឋកិច្ច និងបច្ចេកវិទ្យា រហូតដល់ការកើនឡើងនៃបំណុល និងផ្លាស់ប្តូរសមត្ថភាពរួមរបស់ពិភពលោកក្នុងការដោះស្រាយបញ្ហាទាំងនោះ៕