ប្រទេសម៉ិកស៊ិក បាននិយាយកាលពីថ្ងៃអង្គារ ទី២០ ខែមករា ថា ខ្លួនបានប្រគល់សមាជិកក្រុមជនអន្ធពាលនៃឧក្រិដ្ឋកម្មរៀបចំទុកដែលសង្ស័យចំនួន៣៧នាក់ទៅឱ្យសហរដ្ឋអាមេរិក ដែលប្រធានាធិបតី លោក Donald Trump បានគំរាមវាយប្រហារតាមដីគោកប្រឆាំងក្រុមជួញដូរគ្រឿងញៀននៅទីនោះ។

រដ្ឋាភិបាលបាននិយាយថា នេះគឺជាការប្រគល់លើកទីបីក្នុងរយៈពេលប្រហែលមួយឆ្នាំកន្លងទៅនេះ ដែលធ្វើឱ្យចំនួនសរុបកើនឡើងដល់៩២នាក់ប៉ុន្តែពុំបានបញ្ជាក់ពីសញ្ជាតិរបស់ឧក្រិដ្ឋជនសង្ស័យនោះទេ។

ការប្រកាសនេះ បានធ្វើឡើងជាងមួយសប្តាហ៍បន្ទាប់ពីប្រធានាធិបតី លោកស្រី Claudia Sheinbaum បានពិភាក្សាអំពីសន្តិសុខជាមួយលោក Trump ហើយបានប្រាប់លោកថា ការដាក់ពង្រាយកងទ័ពសហរដ្ឋអាមេរិកនៅម៉ិកស៊ិកគឺ«ពុំមាននៅលើតុចរចាទេ»។

លោក Trump បាននិយាយថា ការវាយប្រហារតាមដីគោកប្រឆាំងក្រុមជួញដូរគ្រឿងញៀននឹងធ្វើឡើងបន្ទាប់ពីប្រតិបត្តិការតាមសមុទ្ររបស់សហរដ្ឋអាមេរិកកាលពីពេលថ្មីៗនេះនៅសមុទ្រប៉ាស៊ីហ្វិក និងសមុទ្រការ៉ាអ៊ីប ដោយពុំបានបញ្ជាក់ថានៅទីណា ឬពេលណានោះទេ។ លោកស្រី Sheinbaum បានបង្កើនការធ្វើបត្យាប័នមេដឹកនាំក្រុមជួញដូរគ្រឿងញៀន និងបានពង្រឹងកិច្ចសហប្រតិបត្តិការនៅព្រំដែន ប៉ុន្តែបានប្រឆាំងដដែលៗចំពោះអន្តរាគមន៍យោធាណាមួយ។

លោកស្រី បានបង្ហាញពីការថយចុះ៥០ភាគរយនៃការរឹបអូសសារធាតុហ្វង់តានីល(fentanyl) នៅព្រំដែនភាគខាងត្បូងសហរដ្ឋអាមេរិក ដោយមានការធ្លាក់ចុះ៤០ភាគរយនៃករណីឃាតកម្មនៅម៉ិកស៊ិក និងការរឹបអូសគ្រឿងញៀនរាប់រយតោន ជាភស្តុតាងភាពជោគជ័យនៃគោលនយោបាយរបស់លោកស្រី។ ចាប់តាំងពីការចាប់ខ្លួនប្រធានាធិបតីវ៉េណេស៊ុយអេឡាពីទីក្រុងការ៉ាកាស លោក Trump ក៏បានគំរាមប្រឆាំងនឹងរដ្ឋាភិបាលឆ្វេងនិយមផ្សេងទៀតនៅក្នុងតំបន់ រួមមានប្រទេសគុយបា កូឡុំប៊ី និងប្រទេសម៉ិកស៊ិក។