ក្រុមអ្នកការទូតបាននិយាយថា ប្រទេសអឺរ៉ុបជាច្រើន កំពុងពិចារណាថាតើត្រូវឈប់បញ្ជូនបុគ្គលិករបស់ពួកគេទៅកាន់មជ្ឈមណ្ឌលសម្របសម្រួលមួយ ដឹកនាំដោយយោធាអាមេរិក សម្រាប់តំបន់ហ្កាហ្សា ដែរឬយ៉ាងណា ដោយនិយាយថា មជ្ឈមណ្ឌលនោះបានបរាជ័យក្នុងការបង្កើនលំហូរជំនួយទៅកាន់តំបន់ដែលរងការបំផ្លិចបំផ្លាញដោយសង្គ្រាម ហើយមជ្ឈមណ្ឌលនេះក៏មិនសម្រេចបានការផ្លាស់ប្តូរនយោបាយនៅទីនោះដែរ។

មជ្ឈមណ្ឌលសម្របសម្រួលស៊ីវិល-យោធា (CMCC) ត្រូវបានបង្កើតឡើងនៅភាគខាងត្បូងអ៊ីស្រាអែល ក្នុងខែតុលា ក្រោមផែនការសន្តិភាពរបស់លោកប្រធានាធិបតីអាមេរិក Donald Trump ដើម្បីបញ្ចប់សង្គ្រាមនៅតំបន់ហ្កាហ្សា។ មូលដ្ឋានហ្កាហ្សាមួយនេះ មានភារកិច្ចត្រួតពិនិត្យបទឈប់បាញ់រវាងអ៊ីស្រាអែល និងក្រុមហាម៉ាស ដោយសម្រួលដល់ការចូលនៃជំនួយ និងការអភិវឌ្ឍគោលនយោបាយក្រោយសង្គ្រាមសម្រាប់ទឹកដីប៉ាឡេស្ទីន។

ប្រទេសរាប់សិប រួមទាំងអាល្លឺម៉ង់ បារាំង អង់គ្លេស អេហ្ស៊ីប និងអារ៉ាប់រួម បានបញ្ជូនបុគ្គលិក រួមទាំងអ្នករៀបចំផែនការយោធា និងមន្ត្រីចារកម្មរបស់ពួកគេទៅមជ្ឈមណ្ឌលនេះ ដើម្បីព្យាយាមជះឥទ្ធិពលដល់កិច្ចពិភាក្សាលើអនាគតរបស់ដែនដីហ្កាហ្សា។ ប៉ុន្តែប្រភពអ្នកការទូតបរទេសបានប្រាប់សារព័ទ៌មានរ៉យទ័រថា ក្រុមមន្ត្រីមកពីប្រទេសអឺរ៉ុបមួយចំនួន មិនទាន់វិលត្រឡប់ទៅមូលដ្ឋាន CMCC ដែលមានទីតាំងនៅជិតព្រំដែនហ្កាហ្សានោះវិញទេ ចាប់តាំងពីថ្ងៃឈប់សម្រាកបុណ្យណូអែល និងឆ្នាំថ្មីមក។

ប្រទេសជាច្រើនកំពុងចោទសួរអំពីគោលបំណងនៃមជ្ឈមណ្ឌលនេះ ដោយអ្នកការទូតលោកខាងលិចម្នាក់បានពិពណ៌នាមូលដ្ឋាននេះថា "គ្មានទិសដៅ"។ ការគិតឡើងវិញរបស់អឺរ៉ុប គឺជាសញ្ញាចុងក្រោយបំផុតនៃភាពមិនស្រួលចិត្តក្នុងចំណោមសម្ព័ន្ធមិត្តទីក្រុងវ៉ាស៊ីនតោន ខណៈលោក Trump បន្តដើរតាមគោលនយោបាយការបរទេសបែបមិនធម្មតារបស់លោក ចំពោះតំបន់ហ្កាហ្សា ដែនដីហ្គ្រីនឡែន និងប្រទេសវ៉េណេស៊ុយអេឡា ជាដើម៕