បេសកជនពិសេសរបស់សហរដ្ឋអាមេរិកប្រចាំប្រទេសស៊ីរី លោក Tom Barrack បាននិយាយថា តួនាទីរបស់កងកម្លាំងប្រជាធិបតេយ្យស៊ីរី (SDF) ដែលជា «កម្លាំងប្រឆាំងក្រុមអាយស៊ីស(ISIS) ជាចម្បងនៅលើទឹកដីនោះបាន «ផុតកំណត់ភាគច្រើន» ខណៈរដ្ឋាភិបាលស៊ីរី បានត្រៀមជាស្រេចដើម្បីទទួលខុសត្រូវផ្នែកសន្តិសុខ ។

លោក Barrack បានសរសេរនៅលើបណ្តាញ X ថា «តាមប្រវត្តិសាស្ត្រ វត្តមានយោធាអាមេរិកនៅភាគឦសានប្រទេសស៊ីរី ត្រូវបានទុកថាសមហេតុផលជាចម្បងថាមានភាពជាដៃគូប្រឆាំងក្រុមអាស៊ីស(ISIS)។ លោកបាននិយាយបន្ថែមថា ស្ថានភាពរបស់ប្រទេសស៊ីរី បានផ្លាស់ប្តូរ «ជាមូលដ្ឋាន» ដោយទីក្រុងដាម៉ាសបានចូលរួមជាមួយក្រុមចម្រុះសកលដើម្បីកម្ចាត់ក្រុមអាស៊ីស(ISIS) ជាសមាជិកទី៩០ របស់ខ្លួនកាលពីចុងឆ្នាំ២០២៥។

លោកបាននិយាយថា ពេលនេះប្រទេសស៊ីរី «មានឆន្ទៈ និងមានជំហរក្នុងការជំរុញការទទួលខុសត្រូវផ្នែកសន្តិសុខ» រួមទាំងការគ្រប់គ្រងទីតាំងឃុំឃាំងនិងជំរំរបស់ក្រុមអាយស៊ីស(ISIS)។

បេសកជនរូបនេះបាននិយាយបន្តថា ខណៈរដ្ឋាភិបាលស៊ីរីទទួលយកជំហររបស់ខ្លួនជាកងកម្លាំង «ប្រឆាំងក្រុមអាស៊ីស(ISIS)» បច្ចុប្បន្ននេះវាបានបង្កើត «ច្រកពិសេសតែមួយ» សម្រាប់ក្រុមឃឺដដើម្បីធ្វើសមាហរណកម្មបន្ទាប់ពីប្រធានាធិបតី លោក Ahmed al-Sharaa បានប្រកាសថា ក្រុមឃឺដនឹងទទួលបានសិទ្ធិជាពលរដ្ឋ និងការការពារភាសាឃឺដ។ លោក Barrack ក៏បាននិយាយផងដែរថា អនាគតនៃសហគមន៍ឃឺដនៅក្នុងប្រទេសស៊ីរីពេលនេះស្ថិតនៅ «ផ្លូវឆ្ពោះទៅរកការធ្វើសមាហរណកម្មពេញលេញ» បន្ទាប់ពីបទឈប់បាញ់រយៈពេលបួនថ្ងៃដែលត្រូវបានប្រកាសដោយរដ្ឋាភិបាល។