ប្រជាជនវ៉េណេស៊ុយអេឡា ដែលកំពុងដើរទិញឥវ៉ាន់នៅផ្សារទីក្រុងដ៏ល្បីល្បាញមួយកន្លែងនៅភាគខាងត្បូងទីក្រុង Caracas កាលពីថ្ងៃអង្គារ ទី២០ ខែមករា បាននិយាយថា តម្លៃទំនិញហក់ឡើង ហើយប្រាក់ឈ្នួលទាបនៅតែបន្តធ្វើឱ្យថវិកាគ្រួសារធ្លាក់ចុះ ទោះបីជាប្រជាជនមួយចំនួនបានសម្តែងសុទិដ្ឋិនិយមប្រុងប្រយ័ត្នចំពោះជំពូកនយោបាយថ្មីក៏ដោយ។

អ្នកស្រុកមួយចំនួនបាននិយាយថា ពួកគេសង្ឃឹមថាការពង្រីកទំនាក់ទំនងពាណិជ្ជកម្មជាមួយសហរដ្ឋអាមេរិក និងការវិនិយោគអាជីវកម្មនៅទីបំផុតនឹងនាំឱ្យមានកំណើនការងារ និងរូបិយប័ណ្ណមានស្ថិរភាព។ ឆ្មាំសន្តិសុខ ដែលឈរនៅក្បែរតូបលក់ផ្លែឈើមានដាក់ស្លាកតម្លៃសរសេរដោយដៃ បាននិយាយថា «យើងកំពុងរង់ចាំមើលថាមានអ្វីកើតឡើង វាគ្មានអ្វីច្បាស់លាស់នៅឡើយទេ»។

លោកបាននិយាយថា ការទិញទំនិញបានធ្លាក់ចុះ ហើយប្រាក់ឈ្នួល «ពិតជាធ្លាក់ចុះយ៉ាងខ្លាំង» ប៉ុន្តែលោកបាននិយាយបន្ថែមថា លោកសង្ឃឹមថាឱកាសនឹងកើនឡើង ប្រសិនបើវិនិយោគិនបរទេសត្រឡប់មកវិញ ហើយប្រទេសវ៉េណេស៊ុយអេឡាបើកចំហសម្រាប់ក្រុមហ៊ុនជាច្រើនទៀត។ ពលរដ្ឋស្ត្រីម្នាក់ បាននិយាយថា អ្នកស្រីចង់ឱ្យស្ថានភាពប្រសើរឡើង ប៉ុន្តែចង់នៅឱ្យឆ្ងាយពីនយោបាយ។ អ្នកស្រីនិយាយថា អាទិភាពរបស់គាត់គឺប្រាក់ខែកាន់តែប្រសើរ តម្លៃទំនិញមានស្ថេរភាព និងឱកាសការងារ។

ការវាយឆ្មក់របស់យោធាសហរដ្ឋអាមេរិក ដែលបានចាប់ខ្លួនមេដឹកនាំវ៉េណេស៊ុយអេឡា លោក Nicolas Maduro បានរុញប្រទេសនេះចូលទៅក្នុងភាពច្របូកច្របល់នៃភាពមិនប្រាកដប្រជាខាងនយោបាយ និងសេដ្ឋកិច្ច។ យោងតាមការព្យាករចុងក្រោយរបស់មូលនិធិរូបិយវត្ថុអន្តរជាតិ(IMF)ដែលបានចេញផ្សាយក្នុងខែតុលាបានឲ្យដឹងថា ប្រទេសវ៉េណេស៊ុយអេឡា បានបញ្ចប់ឆ្នាំ ២០២៥ ដោយមានអតិផរណា ៥៤៨%។