អង្គការរំដោះប៉ាឡេស្ទីន (PLO) កាលពីថ្ងៃអង្គារបានថ្កោលទោសអ៊ីស្រាអែលជុំវិញការរុះរើរចនា សម្ព័ន្ធ នៅក្នុងបរិវេណទីភ្នាក់ងារសង្គ្រោះ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) នៅក្នុងទីក្រុងហ្ស៊េរុយសាឡឹមខាងកើត ដោយហៅទង្វើនេះថា ជា «ការវាយប្រហារដោយចំហ» ទៅលើUN។

នាយកដ្ឋានកិច្ចការជនភៀសខ្លួនរបស់អង្គការរំដោះប៉ាឡេស្ទីន បាននិយាយថា ចំណាត់ការនេះមានបំណងបញ្ចប់វត្តមានមនុស្សធម៌ និងនយោបាយរបស់ UNRWA នៅក្នុងទីក្រុងនេះ ដោយបានបានជំរុញឲ្យសហគមន៍អន្តរជាតិធ្វើអន្តរាគមន៍ ដើម្បីទប់ស្កាត់«ការដួលរលំនៃប្រព័ន្ធអន្តរជាតិនេះ»។

សាក្សី និងប្រភពប៉ាឡេស្ទីន បាននិយាយថា កងកម្លាំងអ៊ីស្រាអែលដែលអមដោយគ្រឿងចក្រឈូសឆាយបានចូលទៅក្នុងបរិវេណនោះ កាលពីព្រឹកថ្ងៃអង្គារ ដើម្បីរុះរើការិយាល័យចល័តមួយចំនួន។ បន្ទាប់ពីការរុះរើ ទង់ជាតិអង្គការសហប្រជាជាតិ ត្រូវបានដកចេញ ហើយត្រូវបានដាក់ជំនួសដោយទង់ជាតិអ៊ីស្រាអែល។

អាជ្ញាធរគ្រប់គ្រងដីធ្លីអ៊ីស្រាអែល បានពិពណ៌នាអំពីប្រតិបត្តិការនេះថា ជាសកម្មភាពអនុវត្តច្បាប់ប្រឆាំងនឹងរចនាសម្ព័ន្ធ «ខុសច្បាប់» ដែលរំលោភលើច្បាប់ផែនការ និងសំណង់។ រដ្ឋមន្ត្រីសន្តិសុខជាតិ លោក Itamar Ben-Gvir ដែលជាសមាជិកស្តាំនិយមជ្រុលម្នាក់នៃគណៈរដ្ឋមន្ត្រីរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ( Benjamin Netanyahu) មានវត្តមាននៅកន្លែងកើតហេតុ ហើយបានសាទរថ្ងៃរុះរើរចនាសម្ព័ន្ធនេះថា ជា «ថ្ងៃដ៏សំខាន់សម្រាប់អធិបតេយ្យភាពនៅក្នុងទីក្រុងហ្ស៊េរុយឡឹម»។

លោក Philippe Lazzarini អគ្គស្នងការ UNRWA បានហៅសកម្មភាពនេះថា ជា «ការវាយប្រហារដែលមិនធ្លាប់មានពីមុនមក» និងជា «ការប្រឆាំងនឹងច្បាប់អន្តរជាតិដោយចេតនា» ក្នុងការបង្ហោះនៅលើប្រព័ន្ធផ្សព្វផ្សាយសង្គម X។ ចំណែកក្រុមហាម៉ាសក៏បានថ្កោលទោសប្រតិបត្តិការនេះផងដែរ ដោយហៅវាថា ជា «ការរំលោភបំពានយ៉ាងធ្ងន់ធ្ងរ»៕