រដ្ឋមន្ត្រីក្រសួងមហាផ្ទៃរុស្ស៊ី បានចាប់ផ្តើមដំណើរទស្សនកិច្ចទៅកាន់ប្រទេសគុយបា ដែលជាសម្ព័ន្ធមិត្តកាលពីថ្ងៃអង្គារ ជាការបង្ហាញពីសាមគ្គីភាព បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានព្រមានថា រដ្ឋាភិបាលកុម្មុយនិស្តយូរអង្វែងរបស់កោះនេះ «ត្រូវត្រៀមខ្លួនដួលរលំ» នោះ។

នៅក្នុងខែនេះ លោក ត្រាំ បានព្រមានទីក្រុងឡាហាវ៉ាន់ឲ្យ«ធ្វើកិច្ចព្រមព្រៀង» ដែលលក្ខណៈនៃកិច្ចព្រមព្រៀងនេះ លោកមិនបានបង្ហាញទេ បើមិនដូច្នេះទេ នឹងជួបផលវិបាកស្រដៀងគ្នាទៅនឹងប្រទេសវ៉េណេ    ស៊ុយអេឡា ដែលមេដឹកនាំលោក នីកូឡាស ម៉ាឌូរ៉ូ (Nicolas Maduro) ត្រូវបានបណ្តេញចេញពីអំណាចដោយកងកម្លាំងអាមេរិក ក្នុងការវាយឆ្មក់ទម្លាក់គ្រាប់បែក នៅថ្ងៃទី ០៣ ខែមករា ដែលបានសម្លាប់មនុស្សរាប់សិបនាក់។

ប្រទេសវ៉េណេស៊ុយអេឡា គឺជាសម្ព័ន្ធមិត្តដ៏សំខាន់របស់គុយបា និងជាអ្នកផ្គត់ផ្គង់ប្រេង និងប្រាក់ដ៏សំខាន់ ដែលលោក ត្រាំ បានសន្យាថា នឹងកាត់ផ្តាច់។

រដ្ឋមន្ត្រីក្រសួងមហាផ្ទៃរុស្ស៊ី លោក Vladimir Kolokoltsev បានប្រាប់ទូរទស្សន៍រដ្ឋរុស្ស៊ី Rossiya-1 អំពីសកម្មភាពរបស់សហរដ្ឋអាមេរិក បន្ទាប់ពីចុះចតនៅប្រទេសគុយបាថា៖«យើងនៅក្នុងប្រទេសរុស្ស៊ី ចាត់ទុករឿងនេះថា ជាទង្វើនៃការឈ្លានពានប្រដាប់អាវុធដែលមិនបានបង្កហេតុប្រឆាំងនឹងប្រទេសវ៉េណេ    ស៊ុយអេឡា»។

លោកបានបន្ថែមថា៖«ទង្វើនេះមិនអាចត្រូវចាត់ទុកថា ត្រឹមត្រូវ តាមមធ្យោបាយណាមួយឡើយ ហើយជាថ្មីម្តងទៀតបង្ហាញពីតម្រូវការក្នុងការបង្កើនការប្រុងប្រយ័ត្ន និងពង្រឹងកិច្ចខិតខំប្រឹងប្រែងឲ្យអស់ពីសមត្ថភាព ដើម្បីទប់ទល់នឹងកត្តាខាងក្រៅ»។

ស្ថានទូតរុស្ស៊ីប្រចាំទីក្រុងឡាហាវ៉ាន់ បាននិយាយថា រដ្ឋមន្ត្រីរូបនេះ នឹង«រៀបចំកិច្ចប្រជុំទ្វេភាគីជាបន្តបន្ទាប់» ខណៈពេលដែលកំពុងស្នាក់នៅក្នុងប្រទេសគុយបា៕