ប្រភពព័ត៌មានដែលស្និទ្ធនឹងកិច្ចពិភាក្សាបានប្រាប់ប្រព័ន្ធផ្សព្វផ្សាយ CBS ថា ប្រជាជាតិលើសពី ១០ប្រទេស បានចុះហត្ថលេខាចូលរួមជាមួយ «ក្រុមប្រឹក្សាសន្តិភាព» របស់លោកប្រធានាធិបតីអាមេរិក Donald Trump សម្រាប់តំបន់ហ្កាហ្សា ប៉ុន្តែមានតែប្រទេសមួយចំនួនប៉ុណ្ណោះ បានប្រកាសជាសាធារណៈថាទទួលយកការអញ្ជើញនេះ។

ដូចដែលបានរំពឹងទុក ក្រុមប្រឹក្សានេះនឹងមានបណ្ដាមេដឹកនាំពិភពលោកជាច្រើនរូប និងវត្តមានលោក Trump ជាប្រធាន។ សេតវិមានបាននិយាយថា ប្រទេសនានាអាចរួមចំណែកចំនួន ១ពាន់លានដុល្លារ ដើម្បីក្លាយជាសមាជិកអចិន្ត្រៃយ៍ ជាជាងការកាន់កាប់សមាជិកភាពធម្មតារយៈពេល ៣ឆ្នាំ ប៉ុន្តែកាណាដា បាននិយាយថា ខ្លួននឹងមិនបង់ប្រាក់ចូលរួមនោះទេ។ ប្រភពនិយាយថា ប្រទេសមួយចំនួននឹងចូលរួមចំណែកតិចជាងនេះទៅទៀត ប្រហែលជា ២០លានដុល្លារប៉ុណ្ណោះ។

លោក Trump កាលពីថ្ងៃអង្គារ បានបង្ហើបថា ក្រុមប្រឹក្សាសន្តិភាពរបស់លោក «អាចនឹង» ជំនួសអង្គការសហប្រជាជាតិ។ ជំហាននេះបង្កើនក្តីបារម្ភក្នុងចំណោមអ្នកវិភាគថា ជំនួសឱ្យគោលបំណងត្រួតពិនិត្យការកសាងឡើងវិញនៃតំបន់ហ្កាហ្សា ក្រុមប្រឹក្សានេះនឹងក្លាយជាយានមួយសម្រាប់លោក Trump ក្នុងការព្យាយាមជំនួសស្ថាប័នដែលត្រូវបានបង្កើតឡើងកាលពី ៨០ឆ្នាំមុន ដើម្បីរក្សាសន្តិភាពពិភពលោក។

សារព័ត៌មាន CNN បានរាយការណ៍ដោយយោងតាមច្បាប់ចម្លងនៃសេចក្តីព្រាងធម្មនុញ្ញមួយថា លោក Trump នឹងកាន់តំណែងជាប្រធានក្រុមប្រឹក្សានេះ ដោយពុំមានកំណត់នោះទេ ដែលអាចមានរយៈពេលលើសពីអាណត្តិប្រធានាធិបតីអាមេរិកលើកទីពីរបច្ចុប្បន្នរបស់លោកទៅទៀត៕