ការិយាល័យរបស់លោកប្រធានាធិបតីបារាំង Emmanuel Macron បាននិយាយនៅថ្ងៃពុធ (២១ មករា) នេះថា បារាំង បានស្នើឱ្យសម្ព័ន្ធយោធាណាតូ ធ្វើសមយុទ្ធមួយនៅតំបន់ហ្រ្គីនលែន (Greenland) ហើយទីក្រុងប៉ារីស ក៏បានត្រៀមខ្លួនរួចរាល់ហើយដើម្បីចូលរួមចំណែកក្នុងសមយុទ្ធ។

សំណើនេះបានកើតឡើងនៅពេលដែលបណ្ដាមេដឹកនាំពិភពលោក បានប្រមូលផ្តុំគ្នានៅកិច្ចប្រជុំសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស ជាទីដែលប្រធានាធិបតីអាមេរិក លោក Donald Trump ត្រូវបានគេរំពឹងថា នឹងបន្តជំរុញ «តម្រូវការ» របស់លោកក្នុងការគ្រប់គ្រងកោះហ្រ្គីនលែន ដែលជាទឹកដីស្វយ័តរបស់ប្រទេសដាណឺម៉ាក។

កាលពីសប្ដាហ៍មុន ក្រុមមន្ត្រីនិយាយថា កងកម្លាំងយោធាបារាំង មួយក្រុមតូចបានទៅដល់ទីក្រុងនូក របស់ដែនដីហ្គ្រីនឡែន ខណៈរដ្ឋអឺរ៉ុបមួយចំនួន បានដាក់ពង្រាយកងកម្លាំងមួយចំនួនតូចរបស់ពួកគេ ក្នុងបេសកកម្មឈ្លបយកការណ៍។ លោក Macron ធ្លាប់និយាយកាលពីសប្ដាហ៍មុនថា ក្រុមដំបូងនឹងត្រូវបានពង្រឹងក្នុងពេលឆាប់ៗនេះ ជាមួយនឹង «ទ្រព្យសម្បត្តិផ្លូវគោក ផ្លូវអាកាស និងផ្លូវទឹក»។

ថ្លែងនៅទីក្រុងដាវ៉ូស ថ្ងៃអង្គារសប្ដាហ៍នេះ លោក Macron បាននិយាយថា អឺរ៉ុបនឹងមិនចុះចាញ់នឹង «ពួកធ្វើបាបគេ» និងមិនអាចត្រូវបានគេគំរាមកំហែងនោះឡើយ ដែលជាការរិះគន់ខ្លាំងៗចំពោះការគំរាមរបស់លោក Trump ក្នុងការដាក់ពន្ធគយខ្ពស់ ប្រសិនបើអឺរ៉ុប មិនអនុញ្ញាតឱ្យលោកគ្រប់គ្រងហ្រ្គីនលែន ទេនោះ។ បណ្ដាមេដឹកនាំណាតូ បានព្រមានថា យុទ្ធសាស្ត្រហ្រ្គីនលែន របស់លោក Trump អាចធ្វើឱ្យសម្ព័ន្ធយោធានេះដួលរលំ៕