ភាគីជម្លោះរុស្ស៊ី និងអ៊ុយក្រែន បានស្ដីបន្ទោសដាក់គ្នាកាលពីថ្ងៃអង្គារ (២០ មករា) ថា ជនស៊ីវិលត្រូវបានសម្លាប់ នៅក្នុងការវាយប្រហារតាមអាកាសដែលធ្វើឡើងដោយភាគីម្ខាងទៀត។

នៅខាងរុស្ស៊ី ជនស៊ីវិលពីរនាក់បានស្លាប់ នៅពេលយានដ្រូនរបស់អ៊ុយក្រែនមួយគ្រឿង បានវាយប្រហារយានយន្តស៊ីវិលមួយគ្រឿង នៅក្នុងស្រុក Pogarsky នៃតំបន់ Bryansk របស់រុស្ស៊ី នេះបើតាមការលើកឡើងរបស់អភិបាលរដ្ឋ Bryansk លោក Alexander Bogomaz នៅលើបណ្ដាញផ្ញើសារតេលេក្រាម។

នៅអ៊ុយក្រែន លោក Ivan Fedorov ប្រធានរដ្ឋបាលយោធាតំបន់ Zaporizhzhia បាននិយាយថា ការបាញ់ផ្លោងរបស់រុស្ស៊ី បានសម្លាប់គូស្វាមីភរិយាមួយគូ និងអ្នកជិតខាងវ័យ ៥៧ឆ្នាំម្នាក់ របស់ពួកគេ ព្រមទាំងបង្កការបំផ្លិចបំផ្លាញជាច្រើនផ្សេងទៀត។ ទន្ទឹមនឹងនេះ ប្រធានាធិបតីអ៊ុយក្រែន លោក Volodymyr Zelenskyy បានលើកឡើងថា មនុស្សជាង ១លាននាក់ នៅទីក្រុងគីវ ពុំមានអគ្គិសនីប្រើប្រាស់នោះទេ ដោយសារតែការវាយប្រហាររបស់រុស្ស៊ី លើហេដ្ឋារចនាសម្ព័ន្ធថាមពល។

ទាំងរុស្ស៊ី និងអ៊ុយក្រែន បានអះអាងថា ប្រតិបត្តិការយោធារបស់ខ្លួនមិនកំណត់គោលដៅជនស៊ីវិលនោះទេ ហើយវាយប្រហារតែគោលដៅយោធារបស់ម្ខាងទៀតប៉ុណ្ណោះ។ ប៉ុន្តែក្នុងសង្រ្គាមអស់ជិត ៤ឆ្នាំមកនេះ របាយការណ៍ពីការស្លាប់របស់ជនស៊ីវិល ត្រូវបានរាយការណ៍ជាបន្តបន្ទាប់ ដែលភាគច្រើននៅខាងអ៊ុយក្រែន៕