លោកប្រធានាធិបតី Donald Trump បានថ្លែងសុន្ទរកថា ក្នុងអំឡុងពេលមានសន្និសីទសារព័ត៌មានខ្លី នៅឯសេតវិមាន ខណៈពេលដែលលោកប្រារព្ធឆ្នាំដំបូងនៃអាណត្តិទី២ របស់លោក ក្នុងនាមជាមេដឹកនាំទី៤៧ របស់សហរដ្ឋអាមេរិក។

ក្នុងសន្និសីទសារព័ត៌មាន កាលពីថ្ងៃអង្គារ (ទី២០ ខែមករា ឆ្នាំ២០២៦) លោក Trump បានចាប់ផ្តើមដោយមានឯកសារមួយសំណុំធំមកជាមួយ ដែលលោកបានហៅវាថា ជាសមិទ្ធផលរបស់លោក ដោយបាននិយាយអំពីការកំណត់យកភាសាអង់គ្លេសជាភាសាផ្លូវការរបស់សហរដ្ឋអាមេរិក ចំពោះចំណាត់ការរបស់លោក ក្នុងការបង្ក្រាបលំហូរគ្រឿងញៀនចូលមកក្នុងប្រទេស។ លោក Trump បានលើកឡើងថា៖ «រដ្ឋបាលនេះ បានសម្រេចអ្វីៗជាច្រើនជាងរដ្ឋបាលដទៃទៀត រហូតមកដល់ពេលនេះ»។

ជាមួយគ្នានេះ លោក Trump ក៏បានយកពេលនេះនិយាយអំពីសមិទ្ធផល ជុំវិញការបង្ក្រាបលើជនអន្តោប្រវេសន៍របស់រដ្ឋបាលរបស់លោកដែរ ដោយយករូបថតឧក្រិដ្ឋជនមួយចំនួនដែល ICE (ទីភ្នាក់ងារអនុវត្តច្បាប់អន្តោប្រវេសន៍ និងគយ) របស់សហរដ្ឋអាមេរិក បានចាប់ខ្លួន។ ហើយលោកក៏បានចង្អុលបង្ហាញពីការថយចុះនូវការឆ្លងព្រំដែន និងពោលសរសើរទីភ្នាក់ងារ ICE។

លោក Trump បាននិយាយដោយមោទនភាពថា៖ «រយៈពេល ៨ខែជាប់ៗគ្នា គ្មានជនអន្តោប្រវេសន៍ខុសច្បាប់ចូលប្រទេសទេ។ ជាលើកដំបូងក្នុងរយៈពេល ៥០ឆ្នាំ ឥឡូវនេះយើងកំពុងឃើញភាពផ្ទុយគ្នាស្រឡះ សម្រាប់អន្តោប្រវេសន៍»។ លោក Trump ក៏បានថ្លែងទៅកាន់បណ្ដាទីក្រុងដែលផ្ដល់ជម្រកដល់អ្នកសុំសិទ្ធិជ្រកកោនផងដែរ ដោយបញ្ជាក់ជាថ្មីថា រដ្ឋបាលលោក Trump នឹងលែងផ្តល់មូលនិធិដល់ទីក្រុងទាំងនោះហើយ ចាប់ពីដើមខែកុម្ភៈ។

តាមរយៈការបង្ហោះមួយ នៅលើវេទិកាបណ្ដាញសង្គម X គណនីផ្លូវការ សម្រាប់សេតវិមាន បានចែករំលែករូបថតជាបន្តបន្ទាប់នៃអ្វីគ្រប់យ៉ាងដែលរដ្ឋបាលរបស់លោក Trump សម្រេចបាន រហូតមកដល់ពេលនេះ ជាមួយនឹងចំណងជើងដែលសរសេរថា «៣៦៥ថ្ងៃនៃជ័យជម្នះ។ ការសម្រេចបាននូវសមិទ្ធផលធំៗ»៕