តុលាការកូរ៉េខាងត្បូង បានកាត់ទោសលោកអតីតនាយករដ្ឋមន្រ្តី Han Duck-soo ឲ្យជាប់ពន្ធនាគាររយៈពេល ២៣ឆ្នាំ ក្រោយរកឃើញថា រូបលោកមានទោសពីបទចោទប្រកាន់បះបោរ ពាក់ព័ន្ធនឹងការប្រកាសច្បាប់អាជ្ញាសឹករយៈពេលខ្លីរបស់លោកអតីតប្រធានាធិបតីដ៏អាម៉ាស់មុខ Yoon Suk-yeol ។

លោក Lee Jin-gwan គឺជាចៅក្រមតុលាការស្រុកកណ្តាលសេអ៊ូល និយាយថា លោក Han ត្រូវបានរកឃើញមានទោសនៅថ្ងៃពុធនេះ ថាបានជំរុញឲ្យលោក Yoon ដាក់ច្បាប់អាជ្ញាសឹករយៈពេលខ្លី និងការដែលរូបលោកពុំបានចូលរួមជំនួបគណៈរដ្ឋមន្រ្តីស្របច្បាប់ ដែលតម្រូវដោយច្បាប់កូរ៉េខាងត្បូង ក្រោយក្រឹត្យឲ្យចល័តកងទ័ព ត្រូវបានបញ្ជាដោយលោក Yoon កាលពីខែធ្នូ ឆ្នាំ ២០២៤ ។

លោក Jin-gwan និយាយទៀតថា លោក Han មិនអើពើនឹងកាតព្វកិច្ច និងទំនួលខុសត្រូវ ក្នុងនាមជានាយករដ្ឋមន្រ្តី រហូតដល់ទីបញ្ចប់រកគ្មាន ។

ចៅក្រមរូបនេះ បញ្ជាក់ទៀតថា ដោយសារលទ្ធផលនៃសកម្មភាពរបស់ចុងចោទ កូរ៉េត្បូងស្ថិតក្នុងគ្រោះថ្នាក់នៃការវិលត្រឡប់ទៅរកអតីតកាលដ៏ខ្មៅងងឹត ពេលដែលសិទ្ធិជាមូលដ្ឋាន និងសណ្តាប់ធ្នាប់ប្រជាធិបតេយ្យសេរីរបស់ប្រជាជន ត្រូវបានបំពាន រារាំងពួកគេគេចផុតពីភាពចលាចលនៃរបបផ្តាច់ការ អស់រយៈពេលជាយូរ ។

តុលាការបានបញ្ជាឲ្យឃាត់ខ្លួនលោក Han ក្រោយកាត់ទោស ដោយលើកឡើងពីក្តីបារម្ភចំពោះលទ្ធភាពនៃការបំផ្លាញភ័ស្តុតាង ។

សូមបញ្ជាក់ថា លោក Han វ័យ ៧៦ឆ្នាំ គឺជាសមាជិកលើកដំបូងនៃគណៈរដ្ឋមន្រ្តីរបស់លោក Yoon ត្រូវបានរកឃើញមានទោស និងកាត់ទោសឲ្យជាប់ពន្ធនាគារ ពាក់ព័ន្ធនឹងការប្រកាសច្បាប់អាជ្ញាសឹក ៕