ប្រធានាធិបតីលីបង់ លោក Joseph Aoun បាននិយាយកាលពីថ្ងៃអង្គារថា លោកកំពុងធ្វើការ ដើម្បីរក្សាប្រទេសលីបង់ឲ្យនៅឆ្ងាយពីជម្លោះក្នុងតំបន់ ដោយលើកឡើងពីអ្វីដែលលោកហៅថា ជាជំហានដែលមិនធ្លាប់មានពីមុនមក ដោយរដ្ឋាភិបាលរបស់លោកដែលការពារអំណាចរដ្ឋ និងរក្សាស្ថិរភាព។

ថ្លែងទៅកាន់ក្រុមអ្នកការទូត លោក Aoun បាននិយាយថា រដ្ឋត្រូវតែពង្រីកអំណាចរបស់ខ្លួន នៅទូទាំងទឹកដីលីបង់ទាំងអស់ តាមរយៈស្ថាប័នសន្តិសុខផ្លូវការ។ នេះបើយោងតាមទីភ្នាក់ងារសារព័ត៌មានជាតិ។

លោកបាននិយាយថា រដ្ឋាភិបាលបានអនុម័តផែនការមួយកាលពីឆ្នាំមុន ដើម្បីរឹតបន្តឹងអាវុធ និងពង្រីកការគ្រប់គ្រងរបស់រដ្ឋ ដោយបន្ថែមថា គ្មានការបាញ់ប្រហារណាមួយ ត្រូវបានធ្វើឡើងចេញពីទឹកដីលីបង់ ក្នុងឆ្នាំដំបូងរបស់លោក ក្នុងការកាន់តំណែងនោះទេ ក្រៅពីឧប្បត្តិហេតុដាច់ដោយឡែកពីរ ដែលជនល្មើសត្រូវបានចាប់ខ្លួនភ្លាមៗ។

លោក Aoun បាននិយាយថា កងទ័ពលីបង់បច្ចុប្បន្ន អនុវត្តការគ្រប់គ្រងប្រកបដោយប្រសិទ្ធភាពនៅភាគខាងត្បូងនៃទន្លេ Litani ហើយបានដកចេញអាវុធខុសច្បាប់មួយចំនួនធំ ដោយហៅវាថា ជាសមិទ្ធផលដ៏សំខាន់បំផុត ក្នុងរយៈពេល ៤ ទសវត្សរ៍។

លោកបានបន្ថែមថា វិធានការទាំងនេះ ត្រូវបានអនុវត្តក្រោមកិច្ចព្រមព្រៀងថ្ងៃទី ២៧ ខែវិច្ឆិកា ឆ្នាំ ២០២៤ ដែលមានគោលបំណងការពារអធិបតេយ្យភាពរបស់ប្រទេសលីបង់ និងទប់ស្កាត់ការកើនឡើងភាពតានតឹងតាមបណ្តោយព្រំដែនភាគខាងត្បូង។

កិច្ចព្រមព្រៀងឆ្នាំ ២០២៤ បានជួយរក្សាបទឈប់បាញ់ដ៏ផុយស្រួយរវាងអ៊ីស្រាអែល និងក្រុមហេសបូឡា ដែលជាគណបក្សនយោបាយដ៏មានឥទ្ធិពល និងក្រុមសកម្មប្រយុទ្ធលីបង់ ដែលធ្វើប្រតិបត្តិការដោយឯករាជ្យពីរដ្ឋាភិបាល៕