ប្រទេសចិន នៅថ្ងៃពុធ (ទី២១ ខែមករា ឆ្នាំ២០២៦) នេះ បានបដិសេធពាក្យចចាមអារ៉ាម ដែលថា ខ្លួននឹងចូលទៅប្រកួតប្រជែង ដើម្បីមានឥទ្ធិពល នៅលោកខាងលិច ខណៈដែលការប៉ុនប៉ងរបស់សហរដ្ឋអាមេរិក ដើម្បីគ្រប់គ្រងកោះ Greenland គំរាមកំហែងដល់ការផ្លាស់ប្តូរតុល្យភាពអំណាចរបស់សម្ព័ន្ធភាពសន្តិសុខឆ្លងមហាសមុទ្រអាត្លង់ទិកដែលមានអាយុកាលរាប់ទសវត្សរ៍។

មហិច្ឆតារបស់ប្រធានាធិបតីអាមេរិក លោក Donald Trump ក្នុងការដណ្តើមគ្រប់គ្រងលើអធិបតេយ្យភាពដែនដី Greenland ពីប្រទេសដាណឺម៉ាក បានធ្វើឲ្យសមាជិកអង្គការណាតូ (NATO) រង្គោះរង្គើ និងបានជំរុញឲ្យមានការពិចារណាឡើងវិញ អំពីការពឹងផ្អែកជាប្រពៃណីលើសហរដ្ឋអាមេរិក ជុំវិញបញ្ហាសន្តិសុខ។

នៅពេលត្រូវបានសួរថា តើទីក្រុងប៉េកាំងស្វាគមន៍ «ភាពច្របូកច្របល់» ជុំវិញបញ្ហាកោះ Greenland នេះដែរឬទេ អ្នកនាំពាក្យក្រសួងការបរទេសចិន លោក Guo Jiakun បានប្រាប់សន្និសីទសារព័ត៌មានប្រចាំថ្ងៃថា៖ «យើងមិនមានបំណងប្រកួតប្រជែង ដើម្បីមានឥទ្ធិពលជាមួយប្រទេសណាមួយទេ ហើយយើងក៏នឹងគ្មានថ្ងៃធ្វើដូច្នេះដែរ»។

ជាមួយគ្នានេះ លោក Trump ក៏បានគំរាមកំហែងថា នឹងស្រោចគោលនយោបាយពន្ធពាណិជ្ជកម្ម លើបណ្ដាប្រទេសអឺរ៉ុបផងដែរ ប្រសិនបើការទាមទាររបស់លោក ក្នុងការទិញយកកោះអាក់ទិកមួយនេះ ត្រូវបានជំទាស់។ ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បានព្រមានថា ការដំឡើងពន្ធលើប្រទេសឆ្លងមហាសមុទ្រអាត្លង់ទិកនេះ នឹងផ្ដល់ផលចំណេញដល់ចិន និងរុស្ស៊ី ដែលប្រទេសទាំង ២ នឹងទទួលបានអត្ថប្រយោជន៍ពី «ការបែកបាក់ក្នុងចំណោមសម្ព័ន្ធមិត្ត» នេះ។

ពាក់ព័ន្ធនឹងការលើកឡើងនេះ លោក Guo បានប្រាប់ថា៖ «យើងចូលរួមក្នុងការផ្លាស់ប្តូរប្រកបដោយភាពអំណោយផល ជាមួយប្រជាជាតិទាំងអស់ ដោយផ្អែកលើការគោរពគ្នាទៅវិញទៅមក និងសមភាព ហើយនៅតែប្តេជ្ញាចិត្តក្នុងការធ្វើជាកម្លាំង ប្រកបដោយភាពវិជ្ជមាន ស្ថិរភាព និងស្ថាបនា»៕