មេដឹកនាំស្តាំនិយមជ្រុលបារាំង លោកស្រី Marine Le Pen បាននិយាយយ៉ាងសុភាពរាបសារ ខណៈពេលកំពុងឆ្លើយសំណួររបស់ចៅក្រម អំឡុងសវនាការបណ្ដឹងឧទ្ធរណ៍របស់លោកស្រី នៅទីក្រុងប៉ារីស នាថ្ងៃទី២០ និងទី២១ ខែមករា ឆ្នាំ២០២៦ នេះ ប៉ុន្តែបានបដិសេមិនបានប្រព្រឹត្តអ្វីខុសឡើយ បន្ទាប់ពីជាប់បម្រាមមិនឲ្យប្រកួតប្រជែងដណ្ដើមតំណែងសាធារណៈ ដោយសារតែត្រូវបានកាត់ទោសពីបទប្រើប្រាស់មូលនិធិរបស់សហភាពអឺរ៉ុប (EU) មិនត្រឹមត្រូវ។

លោកស្រី Le Pen ដែលជាមេដឹកនាំដ៏យូរអង្វែងរបស់គណបក្សស្តាំនិយមជ្រុល គឺ National Rally (RN) កំពុងប្រឈមនឹងដំណើរការសវនាការបណ្ដឹងឧទ្ធរណ៍ដ៏សំខាន់មួយ ដែលនឹងកំណត់ថា តើលោកស្រីអាចឈរឈ្មោះក្នុងការបោះឆ្នោតប្រធានាធិបតីឆ្នាំ២០២៧ បានដែរ ឬទេ បន្ទាប់ពីលោកស្រីត្រូវបានហាមឃាត់មិនឲ្យឈរឈ្មោះជាបេក្ខជនសាធារណៈរយៈពេល ៥ឆ្នាំ នៅឆ្នាំ២០២៥ ដែលចូលជាធរមានភ្លាមៗ។

លោកស្រី Le Pen និងឥស្សរជនផ្សេងទៀត ត្រូវបានរកឃើញថា មានទោសពីបទកិបកេងទឹកប្រាក់ជាង ៤លានអឺរ៉ូ (៤,៧លានដុល្លារ) នៃមូលនិធិរបស់ EU។ ចៅក្រម បានបញ្ជាក់ថា ចន្លោះឆ្នាំ២០០៤ និងឆ្នាំ២០១៦ ពួកគេបានប្រើប្រាស់មូលនិធិដែលបានកំណត់ សម្រាប់ការងារនៅសភាអឺរ៉ុប ទៅបើកឲ្យបុគ្គលិកដែលកំពុងធ្វើការឲ្យគណបក្ស។

អំឡុងពេលឆ្លើយសំណួររបស់លោកស្រីចៅក្រម Michele Agi លោកស្រី Le Pen បានប្រកាន់ខ្ជាប់ ក្នុងការដោះស្រាយសេចក្ដីសំអាងផ្នែកច្បាប់ ដោយផ្ទុយពីវិធីសាស្រ្តពីមុនរបស់លោកស្រី ដែលជំទាស់នឹងភាពស្របច្បាប់នៃការចោទប្រកាន់នេះ។ ប៉ុន្តែនៅក្នុងខ្លឹមសារ ការផ្ដល់ហេតុផលការពាររបស់លោកស្រី ហាក់ដូចជានៅតែមិនផ្លាស់ប្ដូរដដែល ដោយលោកស្រីបានបដិសេធថា មិនមានប្រព័ន្ធនៅក្នុងរង្វង់គណបក្ស RN ដើម្បីយកទៅប្រើប្រាស់មូលនិធិរបស់ EU មិនត្រឹមត្រូវនោះឡើយ៕