នៅថ្ងៃពុធនេះ ក្រុមអាជ្ញាធរ បានជំរុញឲ្យមានការជម្លៀសខ្លួនមនុស្សនៅតាមតំបន់វាលទំនាបមួយចំនួន នៅកោះ North Island របស់ប្រទេសណូវែលសេឡង់ ហើយនគរបាល កំពុងស្វែងរកបុរសបាត់ខ្លួនម្នាក់ ដែលត្រូវបានខ្សែទឹកហូរនាំយកទៅនៅក្នុងទន្លេ ក្រោយភ្លៀងធ្លាក់ខ្លាំងឥតឈប់ឈរ និងខ្យល់បក់ខ្លាំង បង្កជាជាបំណាក់ដី និងទឹកទន្លេឡើង ។

ក្រុមប្រឹក្សាក្នុងស្រុកនៅទូទាំងតំបន់ភាគខាងជើងណូវែលសេឡង់ បានស្នើសុំឲ្យអ្នកស្រុករស់នៅក្នុងតំបន់រងការជន់លិច ផ្លាស់ទីទៅកាន់ទីទួលសុវត្ថិភាព ហើយអ្នកស្រុកផ្សេងទៀត ត្រូវត្រៀមខ្លួនជម្លៀសខ្លួន បើសិនជាចាំបាច់ ។ 

ទីភ្នាក់ងារដឹកជញ្ជូនណេវែសេឡង់ និយាយថា ផ្លូវជាច្រើនខ្សែ បានបិទ ដោយសារបំណាក់ដី និងទឹកជំនន់ដ៏គំហុក ។ 

នគរបាលនិយាយថា បុរសម្នាក់កំពុងបាត់ខ្លួន ក្រោយរូបលោកត្រូវបានខ្សែទឹកហូរនាំយកទៅជាមួយរថយន្តរបស់លោក អំឡុងពេលឆ្លងកាត់ទន្លេនៅជិតទីក្រុង Warkworth នាព្រឹកថ្ងៃពុធនេះ ។

ទីភ្នាក់ងារឧតុនិយមជាតិណូវែលសេឡង់(MetService) បានចេញការព្រមានសម្រាប់តំបន់ពាក់កណ្តាលនៅកោះ North Island ដោយពួកគេនិយាយថា មាននូវការគំរាមកំហែងដល់អាយុជីវិតមនុស្ស ដោយសារស្ថានភាពគ្រោះថ្នាក់របស់ទន្លេ ទឹកជំនន់ដ៏គំហុក និងបំណាក់ដី ក្នុងនោះការបង្អាក់ការធ្វើដំណើរ និងកើតមាននៅតាមតំបន់សហគមន៍ដាច់ស្រយាលមួយចំនួនផងដែរ ៕